SportPress.kz قازاقستان سپورت جاڭالىقتارى
تۋريزم جانە سپورت مينيسترلىگىندە وتكەن كەڭەيتىلگەن وتىرىستا 2024 جىلدان باستاپ سپورت تورەشىلەرىنىڭ ايلىعى بازالىق لاۋازىمدىق جالاقىدان 100%-عا دەيىن كوتەرىلەتىنى بەلگىلى بولدى.
سونداي-اق، سپورتشىلارعا ۇلتتىق بىرىڭعاي تەستىلەۋدەن وتپەي جوو-عا ءتۇسۋ ءۇشىن گرانتتار بەرۋ نورماسى زاڭنامالىق تۇردە ەنگىزىلگەنى جاريا ەتىلدى.
سالا قىزمەتكەرلەرىنىڭ جاعدايىن جاقسارتۋ بويىنشا جۇمىس جالعاسىپ جاتىر. سوڭعى ەكى جىلدا مامانداندىرىلعان مەكتەپ-ينتەرنات-كوللەدجدەردىڭ (رەسپۋبليكالىق جانە وبلىستىق)، سونداي-اق بالالار-جاسوسپىرىمدەر سپورت مەكتەپتەرىنىڭ جاتتىقتىرۋشى-وقىتۋشىلارىنىڭ جالاقىسى 25%-عا ءوستى.
زاڭنامالىق نەگىزدە جاتتىقتىرۋشى-وقىتۋشىلاردىڭ اپتالىق ساعات جۇكتەمەسىن 24-تەن 18 ساعاتقا دەيىن قىسقارتۋ جوسپارلانۋدا، — دەدى ۆەدومستۆو باسشىسى ەرمەك مارجىقپاەۆ.
سونىمەن بىرگە ول كەلەسى جىلدىڭ 19 قاڭتارى مەن 1 اقپانى ارالىعىندا وڭتۇستىك كورەيانىڭ كانۆوندو پروۆينتسياسىنداعى كاننىن قالاسىندا جالاۋى جەلبىرەيتىن IV قىسقى جاسوسپىرىمدەر وليمپياداسىنا قاتىساتىن سپورتشىلاردىڭ دايىنلدىعىنا باسا ءمان بەرىپ، سپورت جانە دەنە شىنىقتىرۋ ىستەرى كوميتەتىنە ۇلتتىق وليمپيادا كوميتەتى، سپورتتى دامىتۋ ديرەكتسياسى جانە وليمپيادالىق دايىندىق ورتالىعىمەن تىزە قوسىپ جۇمىس ىستەۋدى تاپسىردى.
داستان كەنجالين،
استانا
