فۋتزالدان قازاقستان قۇراماسى الەم چەمپيوناتىنا جولداما الدى (فوتو، ۆيدەو)

in باستى تاقىرىپ، فۋتزال 14.12.2023 0 20 رەت وقىلدى

بۇگىن استانا قالاسىنداعى جاقسىلىق ۇشكەمپىروۆ اتىنداعى جەكپە-جەك سارايىندا فۋتزالدان قازاقستان قۇراماسى نيدەرلاند كومانداسىن 2:0 ەسەبىمەن جەڭىپ، الەم چەمپيوناتىنا جولداما الدى.

ماتچتى مەملەكەت باسشىسى قاسىم-جومارت توقاەۆ تاماشالادى. ونىڭ جانىندا WBO جانە IBF تۇجىرىمى بويىنشا كاسىپقوي بوكستان الەم چەمپيونى جانىبەك ءالىمحان ۇلى، تۋريزم جانە سپورت ءمينيسترى ەرمەك مارجىقپاەۆ، قفف پرەزيدەنتى ادىلەت بارمەنقۇلوۆ، فۋتبولدان قازاقستان ۇلتتىق قۇراما كومانداسىنىڭ باس جاتتىقتىرۋشىسى ماگومەد اديەۆ پەن ۇلتتىق قۇرامانىڭ قاقپاشىسى يگور شاتسكيح بولدى.

ال الەمدىك دودا كەلەسى جىلى تاشكەنت قالاسىندا 14 قىركۇيەك پەن 6 قازان ارالىعىندا بولادى.

ماتچ وتە تارتىستى جانە قىزىقتى بولدى. قازاقستان قۇراماسى ويىننىڭ ءبىرىنشى مينۋتىندا ەسەپ اشتى. بۇل گولدى ءبىرجان ورازوۆ سالدى. ودان كەيىن ماتچتىڭ 7-مينۋتىندا دۋگلاس جۋنيور ەكىنشى گولدىڭ اۆتورى اتاندى.

ءبىرىنشى تايمدا ەلىمىزدىڭ باس كومانداسىندا تاعى دا ەسەپتى ەسەلۋگە مۇمكىندىك كوپ بولدى. الايدا ويىنشىلاردىڭ نيدەرلاندتىڭ قاقپاسىن نىساناعا العانىمەن، دوپ تۇسپەي قويدى.
ەكىنشى تايمدا دا ۇلتتىق قۇراما ءجيى شابۋىلداپ، قاۋىپتى جاعداي جاساپ وتىردى. ماتچ وسىلاي قازاقستان كومانداسىنىڭ ۇستەمدىگىمەن اياقتالدى.

قازاقستان قۇراماسى الەم چەمپيوناتىنا ىرىكتەۋ تۋرنيرىندە رۋمىنيا، ازەربايجان جانە نيدەرلاند قۇرامالارىمەن بىرگە ا توبىندا ويناپ جاتىر. قازىر فۋتزالدان ەلىمىزدىڭ باس كومانداسى بەس ويىننان كەيىن 15 ۇپايمەن كوش باستاپ كەلەدى. ال قورجىنىندا 5 ۇپايى بار نيدەرلاند قۇراماسى 2-ورىندا تۇر.

ەندى ەكى قۇراما وسى ماتچتى ساناعاندا ءۇش رەت كەزدەستى. ءۇش ويىندا دا قازاقستان قۇراماسى جەڭدى. العاش رەت 2019 جىلى رۋمىنيانىڭ پياترا-نيامتس قالاسىندا بولعان ماتچتا ەلىمىزدىڭ قۇراماسى قارسىلاسىن 5:0 ەسەبىمەن جەڭسە، بيىلعى ىرىكتەۋ تۋرنيرىندە سىرت الاڭدا نيدەرلاندتان 2:0 ەسەبىمەن باسىم ءتۇستى.

بۇگىن ۇلتتىق قۇراما «قىزعالداقتار ەلىنىڭ» قۇراماسىنان تاعى دا 2:0 ەسەبىمەن ايلاسىن اسىردى.

ەكى قۇرامانىڭ دا ەۋروپا جانە الەمدىك رەيتينگتەگى ورىندارىندا الشاقتىق بار. قازاقستان ەۋروپا رەيتينگىندە 4-ورىندا، الەمدىك رەيتينگتە 7-ورىندا بولسا، «قىزعالداقتار ەلىنىڭ» كومانداسى قارت قۇرلىقتىڭ تىزىمىندە 18-ورىندا، الەمدىك رەيتينگتە 34-ورىندا كەلەدى.

فۋتزالدان الەم چەمپيوناتى ەليتالى ءتۋرنيرى 20 جەلتوقساندا اياقتالادى. ەندى قازاقستاندى ساناماعاندا 14 جانە 20 جەلتوقساندا الەم چەمپيوناتىنا قاتىساتىن 7 كوماندانىڭ تورتەۋى انىقتالادى.

ەليتالى راۋندتاعى بەس توپتىڭ جەڭىمپازدارى الەمدىك دوداعا تىكەلەي جولداما الادى. ال 2-ورىن العان ءتورت ۇزدىك كوماندا پلەي-وفف ماتچتارىندا وينايدى. ولاردىڭ جەرەبەسى 2024 جىلى 25 قاڭتاردا تارتىلادى. ال ءاچ جولداماسى ءۇشىن قالعان ەكى ماتچ 2024 جىلدىڭ 8-17 ساۋىرىنە جوسپارلانعان.

2024 جىلعى الەم چەمپيوناتىنىڭ ىرىكتەۋ ءتۋرنيرى. ەليتالى كەزەڭ. «A» توبى.

ويىن ناتيجەلەرى:

15 قىركۇيەك: نيدەرلاند – قازاقستان 0:2

15 قىركۇيەك: رۋمىنيا – ازەربايجان 3:1

20 قىركۇيەك: قازاقستان – رۋمىنيا 4:3

20 قىركۇيەك: ازەربايجان – نيدەرلاند 6:1

6 قازان: رۋمىنيا – نيدەرلاند 2:1

6 قازان: ازەربايجان – قازاقستان 2:4

10 قازان: نيدەرلاند – رۋمىنيا 1:1

11 قازان: قازاقستان – ازەربايجان 3:2

14 جەلتوقسان: قازاقستان – نيدەرلاند 2:0

كەلەسى ماتچتاردىڭ كەستەسى: