وليمپيادا چەمپيونى جاڭا قىزمەتكە تاعايىندالدى

الماتىدا وتكەن سۋ سپورتى تۇرلەرى فەدەراتسياسىنىڭ كونفەرەنتسياسىندا ۇيىمنىڭ پرەزيدەنتى سايلانىپ، ۆيتسە-پرەزيدەنتى تاعايىندالدى.

جيىندا فەدەراتسيانىڭ پرەزيدەنتى قىزمەتىنە اندرەي كريۋكوۆ ءبىراۋىزدان سايلاندى. سونىمەن قاتار، فەدەراتسيا اتقارۋشى كوميتەتىنىڭ جاڭا قۇرامى جاساقتالدى.

ريو-دە-جانەيرو قالاسىندا وتكەن وليمپيادانىڭ چەمپيونى دميتري بالاندين فەدەراتسيانىڭ ۆيتسە-پرەزيدەنتى قىزمەتىنە تاعايىندالدى.

كونفەرەنتسيادا بۇدان بىلاي فەدەراتسيانىڭ اتاۋى Kazakh Aquatics دەپ وزگەرتىلەتىنى حابارلاندى.

بەس سپورت ءتۇرىن بىرىكتىرگەن فەدەراتسيا سۋ سپورتى تۇرلەرىنەن حالىقارالىق قاۋىمداستىقتىڭ مۇشەسى.  فەدەراتسيانىڭ التى مۇشەسى World Aquatics حالىقارالىق فەدەراتسياسىنىڭ باسقارۋشى ورگاندارىندا قىزمەت ەتەدى. 50-دەن اسا قىزمەتكەرى حالىقارالىق فەدەراتسيانىڭ تەحنيكالىق كوميتەتتەرى مەن سپورت تۇرلەرى بويىنشا حالىقارالىق تورەشىلەر كورپۋسىنا مۇشە.

بيىلعى ازيادادا قازاقستان سسۋ سپورتى تۇرلەرىنەن كوڭىل كونشىتەرلىك ناتيجە كورسەتكەن جوق. سۋ دوبىنان ەلىمىزدىڭ ايەلدەر قۇراما كومانداسى قولا مەدالدى الىپ، العا قويعان جوسپاردى ورىنداپ شىقتى.

ەرلەر قۇراماسى ازيا ويىندارىنىڭ بىرنەشە دۇركىن چەمپيوندارى بولا تۇرا فينالعا شىعا المادى. ولار دا قولا جۇلدەنى قاناعات تۇتتى. ناتيجەسىندە ۆاتەرپولشىلارىمىز 3-ورىن السا دا وليمپياداعا بەرىلەتىن  ليتسەنزيادان قۇر قالدى. ەندى ۇلتتىق قۇرامامىز الداعى الەم چەمپيوناتىندا وليمپيادا جولداماسى ءۇشىن تاعى جارىسقا قاتىسادى.

داستان كەنجالين،

استانا