ازيادانىڭ كۇمىس جۇلدەگەرىنە استانادان پاتەر بەرىلدى

استانادا «استانا» سپورت فورۋمىندا  بولدى. وندا جىلدىڭ ۇزدىك سپورتشىسى مەن جاتتىقتىرۋشىسى، باسقا دا سپورتقا قاتىسى بار ادامداردى ماراپاتتۋ ءراسىمى ءوتتى.

ءىس-شارادا قىتايدىڭ حانچجوۋ قالاسىندا وتكەن ازيا ويىندارىنىڭ كۇمىس جۇلدەگەرى گالينا دۋۆانوۆاعا پاتەر كىلتى تابىس ەتىلدى، دەپ حابارلادى قالا اكىمدىگىنىڭ رەسمي سايتى.

استانا اكىمدىگىنىڭ قولداۋىمەن «قازاقستان سپورتشىلار وداعى» رقب ۇيىمداستىرعان ءىس-شارا بەيبىتشىلىك جانە كەلىسىم سارايىندا ءوتتى.

استانا قالاسى اكىمىنىڭ ورىنباسارى ەسەت بايكەن ءىس-شارانىڭ ءمانى مەن ماڭىزى تۋرالى ايتا كەلىپ، ەلىمىز قاي كەزدە بولسىن جىلدىڭ ۇزدىگى اتانعان سپورتشىلار مەن جاتتىقتىرۋشىلاردىڭ، سپورت ۇيىمدارىنىڭ ەڭبەگىن باس بارماقپەن باعالايتىنىن اتاپ ءوتتى.

فورۋم قازىلار القاسى مۇشەلەرىنىڭ داۋىس بەرۋ قورىتىندىسى بويىنشا اتالىمداردىڭ جەڭىمپازدارى اتاندى. وندا «سپورت ارداگەرلەرى» نوميناتسياسىندا مارات قۋانىشەۆ، مەرەي اقشالوۆ، جانات ماناشەۆ پەن اناتولي حراپاتىي (قايتىس بولعاننان كەيىن)، «ەرلەر اراسىنداعى جىل سپورتشىسى» اتالىمىندا  نۇربەك ورالباي، «ايەلدەر اراسىنداعى جىل سپورتشىسى» نوميناتسياسىندا ءجاميلا باقبەرگەنوۆا ۇزدىك دەپ تانىلدى. سونداي-اق، اقمارال ناۋاتبەك ايەلدەر اراسىنداعى ۇزدىك پارا سپورتشى، ەرعالي شامەي ەرلەر اراسىنداعى پارا سپورتشى، داۋرەن ورازوۆ سپورت تۇرلەرى بويىنشا جىل جاتتىقتىرۋشىسى، اسقار ەركەباەۆ جىل جاتتىقتىرۋشىسى اتاندى.

استانانىڭ ۇلتتىق جانە وليمپيادالىق ات سپورتى تۇرلەرىنىڭ فەدەراتسياسى «جىلدىڭ ۇزدىك ەلوردالىق فەدەراتسياسى»، گۇلنار بازاراليەۆا «ۇلتتىق سپورت تۇرلەرى بويىنشا ۇزدىك سپورتشى»، استانا اكىمدىگىنىڭ «بالالار-جاسوسپىرىمدەر سپورت مەكتەبى، مۇگەدەكتەرگە ارنالعان سپورت مەكتەبى» كمم «جىلدىڭ ۇزدىك بالالار-جاسوسپىرىمدەر سپورت مەكتەبى»، نۇرجان باتىربەكوۆ پەن «جەڭىس» فۋتبول كلۋبى «جىل سەرپىلىسى»، دميتري ينيۋتين، اسحات مۇقاشەۆ، اسەت نۇرعوجين، قۋانىش نۇرتاقوۆ «جىل مەتسەناتى» اتالىمىندا ۇزدىك شىقتى.