ارىپتەستەرىمىزدى سەيداعاڭنىڭ سىيلىعىمەن قۇتتىقتايمىز!

بۇگىن تۋريزم جانە سپورت مينيسترلىگىنىڭ ۇيىمداستىرۋىمەن جىلدىڭ ۇزدىك سپورتشىلارى، ۇزدىك جاتتىقتىرۋشىلارى مەن سپورتتى قولداۋدا ۇلكەن ۇلەس قوسىپ جۇرگەن مامانداردى ماراپاتتاۋعا ارنالعان «ۇزدىك» اتتى سالتاناتتى ءىس-شارا بولدى.

وسى جيىندا تۋريزم جانە سپورت ءمينيسترى ەرمەك مارجىقپاەۆ باستاعان سپورت سالاسىنىڭ باسشىلارى مەن وليمپيادا چەمپيوندارى ءار اتالىمدا جىلدىڭ ۇزدىگى اتانعان سپورتشىلار مەن جاتتىقتىرۋشىلاردى، سپورت ۇيىمدارى مەن وبلىستىق جانە اۋداندىق سپورت باسقارمالارىن ماراپاتتادى.

سالتاناتتى ءىس-شارادا كەزەك ارىپتەستەرىمىزدى ماراپاتتاۋعا كەلگەندە بەلگىلى جۋرناليست، ارىپتەسىمىز Atameken business تەلەارناسىنىڭ ءجۋرناليسى سامات قاناعاتوۆ، «سپورت جۇلدىزدارى» جۋرنالىنىڭ شەف-رەداكتورى جاندوس بۇسىرمانوۆ پەن Meta-ratings.kz سايتىنىڭ باس رەداكتورى ەربول قايىروۆ سەيداحمەت بەردىقۇلوۆ اتىنداعى سىيلىقتىڭ لاۋرەاتى اتاندى. ياعني، جىلدىڭ ۇزدىك سپورت ءجۋرناليسى اتاعىن يەلەندى.

سامات قاناعاتوۆ 25 جىلدان بەرى سپورتتى ناسيحاتتاپ كەلە جاتقان مامان. ەربول قايىروۆ تا 10 جىلدان استام ۋاقىت سپورت جۋرناليستيكاسىندا ەڭبەك ەتىپ كەلەدى. ەكەۋى سپورت كوممەنتاتورى بولىپ تا جۇمىس ىستەيدى. ال جاندوس ايانبەك شىعارماشىلىقپەن بىرگە شارۋاشىلىقتى دا قاتار ۇستاپ كەلەدى. ول «سپورت جۇلدىزدارى» جۋرنالىنىڭ شەف-رەداكتورى قىزمەتىمەن قوسا، تالعار اۋداندىق بۇقارالىق-سپورتتىق ءىس-شارالاردى ۇيىمداستىرۋ ورتالىعىنىڭ ديرەكتورى.

ءبىز، SportPress.kz اقپاراتتىق-ساراپتامالىق سپورت سايتىنىڭ رەداكتسياسى، جىلدىڭ ۇزدىك سپورت جۋرناليستەرىن لاۋرەات اتانۋىمەن قۇتتىقتاي وتىرىپ، دەندەرىنە ساۋلىق، جۇمىستار شىعارماشىلىق تابىس تىلەيمىز!