ريزابەك ايتمۇحان «جىل ۇزدىگى» اتاندى

ەركىن كۇرەستەن تۇڭعىش الەم چەمپيونى ريزابەك ايتمۇحان ASSYLTAS قوعامدىق قورىنىڭ ۇيىمداستىرۋمەن وتكەن «جىل ۇزدىگى» كونكۋرسىندا جەڭىمپاز اتاعىن جەڭىپ الدى. ول  ASSYLTAS ستيپەندياسىنىڭ يەگەرى اتانىپ،  1،5ميلليون تەڭگە اقشالاي سىياقىمەن ماراپاتتالدى.

بۇل ستيپەنديانى ەكى جىل قاتارىنان بالۋاندار الىپ وتىر. بىلتىر ايەلدەر كۇرەسىنىڭ بالۋانى جاميلا باقبەرگەنوۆا العان بولاتىن.

ريزابەك ايتمۇحانعا كەلسەك، ول جاقىندا 2023 جىلدىڭ قورىتىندىسى بويىنشا «ۇزدىك» اتتى سپورتشىلاردى سالتاناتتى ماراپاتتاۋ ءىس-شاراسىندا «سپورتتاعى ۇزدىك سەرپىن» اتالىمىن جەڭىپ الدى. ودان بولەك، ول قازاقستان كۇرەس فەدەراتسياسى جىلدى قورىتىندىلاۋ كونفەرەنتسياسىندا OLIMPBET بۋكمەكەرلىك كەڭسەسىنىڭ وكىلى بيىلعى الەم چەمپيوناتىندا عاجاپ قايسارلىق تانىتىپ، وتاندىق كۇرەستىڭ تاريحىن قايتا جازعان اسا دارىندى بالۋانعا پاتەر سىيلادى. ونىڭ الدىندا الماتىدا بەلگىلى كاسىپكەر ەرلان قوجاسباي تۇڭعىش رەت قازاق بالۋاندارى اراسىندا ەركىن كۇرەستەن الەم چەمپيونى اتانعان ريزابەك ايتمۇحاندى جەڭىسىمەن قۇتتىقتاپ، Zeekr اۆتوكولىگىن سىيعا تارتتى.

ەسكە سالساق، ريزابەك ايتمۇحان سەربيانىڭ استاناسى – بەلگراد قالاسىندا كۇرەس تۇرلەرىنەن وتكەن الەم چەمپيوناتىندا تۇڭعىش رەت باس جۇلدەنى جەڭىپ الدى. ارينە، قازاقتا كۇرەستەن حالىقارالىق ارەنادا مويىندالعان، قۇرمەت تۇعىرىنىڭ ەڭ بيىك ساتىسىنا كوتەرىلگەن تالاي بالۋاندار بولعان. سولاردىڭ ءبىرى دەپ اتى اڭىزعا اينالعان قاجىمۇقان مۇنايتپاس ۇلىن ايتساق بولادى. دەگەنمەن كسرو كەزىندە دە ودان كەيىنگى ەلىمىز تاۋەلسىزدىگىنىڭ اق تاڭى اعارىپ اتقان كەزدەن بەرى دە كۇرەستىڭ وسى تۇرىنەن الەم چەمپيونى اتاعىن جەڭىپ العان بالۋان بولعان ەمەس.

ريزابەك ايتمۇحان سولتۇستىك قازاقستان وبلىسى، ءۋاليحانوۆ اۋدانىنىڭ تۋماسى. كىشكەنەكول دەگەن اۋىلدا تۋعان. بۇل اۋىلدىڭ بۇرىنعى اتى — قىزىل تۋ. وسى اۋداننان احمەتجان قازىمبەتوۆ دەگەن اتاقتى بالۋان، مەملەكەتشىل قايراتكەر شىققان. ول الاشتىڭ ءبىرتۋار تۇلعالارى ماعجان جۇماباەۆ پەن سماعۇل سادۋاقاسوۆ شىققان.

بالۋاننىڭ العاشقى جاتتىقتىرۋشىسى ونىڭ اكەسى — قانات جولداسباي. قازىرگى جاتتىقتىرۋشىسى — ەركەبۇلان كەشۋباەۆ. ريزابەك ەركىن كۇرەستەن ۇلتتىق قۇراما كوماندانىڭ باس جاتتىقتىرۋشى ماديار قۇرامىسوۆتىڭ، اعا جاتتىقتىرۋشى سامات جاقىپوۆتىڭ قول استىندا جاتتىعادى.

ولاردان باسقا ۇلتتىق قۇرامادا ەدۋارد بازروۆ، دارحان بەكەنوۆ، ءاليحان  دەگەن جاتتىقتىرۋشىلار دا بار. ولاردىڭ ءبارى ءبىر كوماندا. ءبارى تالاپشىل، بىلىكتى ماماندار. ءبىر ماقساتتا جۇمىس ىستەيدى.

ريزابەك استاناداعى قاجىمۇقان مۇنايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى مەن الماتىداعى «شاڭىراق» شاعىن اۋدانىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ تۇلەگى.

داستان كەنجالين،

استانا