استانادان بۋرابايعا قاراي جاڭا جىلدىق پويىز شىقتى (ۆيدەو)

جاڭا جىل مەرەكەسى قارساڭىندا استانادان بۋرابايعا دەيىنگى ارنايى برەندتەلگەن ەلەكتر پويىزى جولعا شىقتى. بۇل –تۋريزم جانە سپورت مينيسترلىگى Kazakh Tourism ۇلتتىق كومپانياسى مەن «جولاۋشىلار تاسىمالى» اق-نىڭ بىرلەسكەن جوباسى، دەپ حابارلادى ۆەدومستۆو.

ارنايى پويىزدىڭ قۇرامى جولاۋشىلارعا مەرەكەلىك كوڭىل كۇي سىيلاۋ ءۇشىن ءىشى دە، سىرتى دا جاڭا جىل مەرەكەسىنە ساي بەزەندىرىلگەن. ۆاگون جولسەرىكتەرى ءبىر ۋاقىت اياز اتا مەن اقشاقار كەيپىنە ەنىپ، جولاۋشىلاردى كەلە جاتقان مەرەكەمەن قۇتتىقتاپ، سىيلىقتار تاپسىرادى. مەرەكەلىك بەزەندىرىلگەن پويىز قۇرامى جاڭا جىلدىق دەمالىس ماۋسىمى اياقتالعانعا دەيىن قاتىنايدى.

بيىل ەكىنشى جىل قاتارىنان جاڭا جىل قارساڭىندا قتج-مەن بىرىگىپ، برەندتەلگەن تۋريستىك پويىزدى ىسكە قوسىپ وتىرمىز. مۇنداي پويىز جولاۋشىلارعا مەرەكەلىك اتموسفەرانى سىيلاپ قانا قويماي، تۋريستەردى دە تارتۋعا مۇمكىندىك بەرەدى، — دەدى تۋريزم جانە سپورت ءمينيسترىنىڭ ورىنباسارى ەرجان ەركىنباەۆ.

ايتا كەتەيىك، بىلتىرعى جاڭا جىلدىق ەلەكتر پويىزىمەن 16 مىڭنان استام جولاۋشى تاسىمالدانعان.

مەرەكەلىك پويىز قۇرامى 28 جەلتوقساننان باستاپ اپتاسىنا بەس رەت قاتىنايدى. استانادان بۋراباي كۋرورتىنا پويىز «نۇرلى جول» ۆوكزالىنان تاڭعى ساعات 06:12-دە جۇرەدى. سونىمەن قاتار ەلوردا تۇرعىندارى مەن قالا قوناقتارىنا ىڭعايلى بولۋ ءۇشىن پويىزعا استانا-1 ۆوكزالىنان دا وتىرعىزۋ قاراستىرىلعان. بۇل جەرگە ەكسپرەسس پويىز تاڭعى ساعات 06:37-دە كەلىپ، 07:00-دە ءجۇرىپ كەتەدى.

تۋريستىك پويىزدى ىسكە قوسۋ اياسىندا قازاقستان رەسپۋبليكاسى پرەزيدەنتىنىڭ ءىس باسقارماسى «بۋراباي دامۋ» جشس ارنايى رەيستىڭ كەستەسىنە سايكەس قىسقا تۋر ۇيىمداستىرادى. جاڭا جىل مەرەكەسىن لايىقتى قارسى الۋ ءۇشىن بۋرابايداعى «سانتا» رەزيدەنتسياسىنا بارىپ، بۋرابايلاندتا كۇن بويى دەمالۋ ۇسىنىلادى. مۇندا بۇعى نەمەسە يت جەگىلگەن اربامەن، كۆادروتسيكلمەن، قاردا جۇرەتىن كولىكتەرمەن سەرۋەندەۋگە، اتقا مىنۋگە بولادى.