Astanadan Býrabaıǵa qaraı jańa jyldyq poıyz shyqty (VIDEO)

Jańa jyl merekesi qarsańynda Astanadan Býrabaıǵa deıingi arnaıy brendtelgen elektr poıyzy jolǵa shyqty. Bul –Týrızm jáne sport mınıstrligi Kazakh Tourism ulttyq kompanııasy men «Jolaýshylar tasymaly» AQ-nyń birlesken jobasy, dep habarlady vedomstvo.

Arnaıy poıyzdyń quramy jolaýshylarǵa merekelik kóńil kúı syılaý úshin ishi de, syrty da jańa jyl merekesine saı bezendirilgen. Vagon jolserikteri bir ýaqyt Aıaz ata men Aqshaqar keıpine enip, jolaýshylardy kele jatqan merekemen quttyqtap, syılyqtar tapsyrady. Merekelik bezendirilgen poıyz quramy jańa jyldyq demalys maýsymy aıaqtalǵanǵa deıin qatynaıdy.

Bıyl ekinshi jyl qatarynan jańa jyl qarsańynda QTJ-men birigip, brendtelgen týrıstik poıyzdy iske qosyp otyrmyz. Mundaı poıyz jolaýshylarǵa merekelik atmosferany syılap qana qoımaı, týrısterdi de tartýǵa múmkindik beredi, — dedi Týrızm jáne sport mınıstriniń orynbasary Erjan Erkinbaev.

Aıta keteıik, byltyrǵy jańa jyldyq elektr poıyzymen 16 myńnan astam jolaýshy tasymaldanǵan.

Merekelik poıyz quramy 28 jeltoqsannan bastap aptasyna bes ret qatynaıdy. Astanadan Býrabaı kýrortyna poıyz «Nurly jol» vokzalynan tańǵy saǵat 06:12-de júredi. Sonymen qatar elorda turǵyndary men qala qonaqtaryna yńǵaıly bolý úshin poıyzǵa Astana-1 vokzalynan da otyrǵyzý qarastyrylǵan. Bul jerge ekspress poıyz tańǵy saǵat 06:37-de kelip, 07:00-de júrip ketedi.

Týrıstik poıyzdy iske qosý aıasynda Qazaqstan Respýblıkasy Prezıdentiniń is basqarmasy «Býrabaı damý» JShS arnaıy reıstiń kestesine sáıkes qysqa týr uıymdastyrady. Jańa jyl merekesin laıyqty qarsy alý úshin Býrabaıdaǵy «Santa» rezıdenııasyna baryp, Býrabaılandta kún boıy demalý usynylady. Munda buǵy nemese ıt jegilgen arbamen, kvadroıklmen, qarda júretin kóliktermen serýendeýge, atqa minýge bolady.