دۇنيەجۇزىلىك كوشپەندىلەر ويىندارىنا دايىندىق قارالدى

استانادا تۋريزم جانە سپورت ءمينيسترى ەرمەك مارجىقپاەۆتىڭ توراعالىعىمەن V دۇنيەجۇزىلىك كوشپەندىلەر ويىندارىنىڭ دايىندىعىنا ارنالعان كەڭەس ءوتتى.

القالى جيىنعا ۇلتتىق سپورت قاۋىمداستىعىنىڭ، ۇلتتىق جانە ات سپورت تۇرلەرى ورتالىعىنىڭ، V دۇنيەجۇزىلىك كوشپەندىلەر ويىندارىن وتكىزۋ جونىندەگى ديرەكتسياسىنىڭ باسشىلىعى جانە ۇلتتىق سپورت فەدەراتسيالارىنىڭ پرەزيدەنتتەرى قاتىسىپ، اتقارىلىپ جاتقان جۇمىستارى تۋرالى بايانداما جاسادى، دەپ حابارلادى تۋريزم جانە سپورت مينيسترلىگىنىڭ ءباسپاسوز قىزمەتى.

جيىندا ءسوز العان ەرمەك مارجىقپاەۆ مەملەكەت باسشىسى قاسىم-جومارت توقاەۆتىڭ «ەگەمەن قازاقستان» گازەتىنە سۇحباتىندا دۇنيەجۇزىلىك كوشپەندىلەر ويىندارىن وتكىزۋ – ەلىمىز ءۇشىن ماڭىزدى سپورتتىق ءىس-شارا ەكەنىن ەرەكشە اتاپ وتكەنىن جەتكىزدى.

ويىنداردىڭ باستالۋىنا ءبىر جىلدان از ۋاقىت قالدى. مەملەكەت باسشىسىنىڭ تاپسىرماسىنا سايكەس، V دۇنيەجۇزىلىك كوشپەندىلەر ويىندارىن ءتيىستى دەڭگەيدە ۇيىمداستىرۋمىز قاجەت. بۇگىنگە دەيىن قانداي شارالار اتقارىلدى، الدا قانداي مىندەتتەر تۇر، سونىمەن قاتار قانداي ماسەلەلەر بار ەكەنىن انىقتاۋىمىز قاجەت. ويىندارعا دايىندىق جاعدايىنا كەلەر بولساق، ازىرگە ءىس-شارالار جوسپار بويىنشا جۇرگىزىلۋدە. ۇلتتىق سپورت تۇرلەرىنەن قۇراما كوماندالاردىڭ دايىندىعى جوعارى دەڭگەيدە ءوتۋى كەرەك. سونىمەن قاتار سپورتشىلارعا ساپالى جاعداي جاساپ، قارجى ماسەلەلەرى تولىق شەشىلۋگە ءتيىس، — دەدى مينيستر.

V دۇنيەجۇزىلىك كوشپەندىلەر ويىندارى اياسىندا ەلىمىزگە الەمنىڭ 100-دەن استام ەلىنەن دەلەگاتسيا كەلەدى دەپ جوسپارلانىپ وتىر. ويىنداردىڭ بىرەگەيلىگى – سپورتتىق، مادەني جانە عىلىمي باعدارلامالاردىڭ ۇشتاسۋىندا. باعدارلاماعا 20 جارىستىق جانە 10 كورنەكى سپورت ءتۇرى كىرىپ، 110 مەدال جيىنتىعى ويناتىلادى. جارىس ات سپورتى، ۇلتتىق كۇرەس، ساداق اتۋ، قۇستارمەن اڭ اۋلاۋدىڭ تۇرلەرى، ءداستۇرلى زياتكەرلىك ويىندار بويىنشا وتەدى.

قازىرگى ۋاقىتتا ءدۇبىرلى دوداعا قاتىساتىن سپورتشىلاردىڭ ءتىزىمى، 2024 جىلعا ارنالعان سپورتتىق-بۇقارالىق ءىس-شارالاردىڭ بىرىڭعاي رەسپۋبليكالىق كۇنتىزبەسىنە كىرەتىن سپورت تۇرلەرى بويىنشا جارىستاردىڭ تىزبەسى بەكىتىلدى. ويىندارعا دايىندىق شەڭبەرىندە ۇلتتىق قۇراما كوماندالاردىڭ سپورتشىلارى 2024 جىلعى قاڭتاردان باستاپ 13 حالىقارالىق، 39 جەرگىلىكتى وقۋ-جاتتىعۋ جيىندارىنا جانە 17 رەسپۋبليكالىق جانە 23 حالىقارالىق جارىسقا قاتىسادى.