كانۆون-2024:قازاقستان حوككەيشىلەرى جارتىلاي فينالعا شىقتى

وڭتۇستىك كورەيانىڭ كانۆون پروۆينتسياسىندا قىسقى سپورت تۇرلەرىنەن ءوتىپ جاتقان IV جاسوسپىرىمدەر وليمپياداسىنىڭ ءتورتىنشى جارىس كۇنى حوككەيدەن قازاقستان قۇراما كومانداسى يسپانيا مەن ۇلىبريتانيا قۇراماسىن جەڭىپ، جارتىلاي فينالعا شىقتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسى.

حوككەيشىلەر يسپانيا كومانداسىن 14:4، ۇلىبريتانيا جاساعىن 22:13 ەسەبىمەن جەڭدى. ەندى 24 قاڭتاردا قازاقستان مەن لاتۆيا جارتىلاي فينالدا كۇش سىناسادى.

وليمپيادادا سپورتتىڭ باسقا تۇرلەرىنەن دە وتانداستارىمىز سىنعا ءتۇسىپ جاتىر.

بياتلوننان ۇلدار اراسىنداعى سپرينتتە انتون رەدكين 17-ورىن السا، كيريلل زوتوۆ 48-ورىنعا يە بولدى. ال ءىلياس حاسەنوۆ 77-ءشى بولىپ مارەگە جەتتى. بۇل جارىسقا بارلىعى 98 سپورتشى قاتىستى. ولار 7،5 كم-گە جۇگىردى.

مۇندا انتونين گاي 20 مينۋت 57.7 سەكۋندتا مارەگە جەتىپ، التىن جۇلدە السا،  توۆ روەسلاند (نورۆەگيا) كۇمىس، فلاۆيو گاي (فرانتسيا) قولا جۇلدەگە يە بولدى.

6 شاقىرىمعا سوزىلعان قىزدار جارىسىندا  الەما كاراباەۆا مارەگە 57-ءشى بولىپ كەلسە، ەۆەلينا مەزەنتسەۆا 62-ورىن الدى. ماريا ۆوروبەۆا مارەگە جەتە المادى. بۇل جارىسقا 98 سپورتشى قاتىستى.

بۇل سايىستا اپەنين تۇبەگىنەن كەلگەن كارلوتتا گاۋتەرو جەڭىسكە جەتتى. ودان كەيىن ەلا سەۆەر (سلوۆەنيا) مەن پولينا پۋتسكو (ۋكراينا) تۇعىر ساتىسىنا كوتەرىلدى. ەرتەڭ بياتلوننان سوڭعى جۇلدە جيىنتىعى ارالاس ەستافەتا سايىسىندا ۇلەستىرىلەدى.

تاۋ شاڭعىسىنان گيگانت سلالوم جاتتىعۋىندا وتانداسىمىز الەكساندرا سكوروحودوۆا فينالدا باق سىناپ، بەسىنشى ساتىعا تۇراقتادى. بۇگىن 79 اتلەت قاتىستى. يتاليا وكىلى دجوردجيا كولوم (48.42 سەكۋند) چەمپيون اتانسا، شايننە زەحندەر (شۆەيتساريا) كۇمىس مەدال، استريد حەدين (شۆەتسيا) قولاا جۇلدەنى يەلەندى.

كونكيمەن 1500 مەترگە جۇگىرۋدە قازاقستان قۇراماسى ساپىنان كريستينا شۋمەكوۆا جەتىنشى ورىن الدى. ونىڭ ۋاقىتى — 2:06،47. ال الينا شۋمەكوۆا 11-ورىنعا ورنالاستى.

بۇگىن نيدەرلاند سپورتشىسى انگەل دالەمان قارسىلاس شاق كەلتىرمەي، ەكى التىن جۇلدەنى جەڭىپ الدى.  كۇمىس جۇلدەنى يۋنگي لۋي (قىتاي)، قولا مەدالدى پولشا اتلەتى اننا مازۋر يەلەندى.

ۇلدار اراسىندا رۋسلان ءجانادىلوۆ سەگىزىنشى ورىننان كورىنسە، ميحايل ماتريۋحين 17-ورىندا قالدى. مۇندا فينن سوننەكالب توپ جارسا، قىتاي سپورتشىسى باوشين پان ەكىنشى، سوتا كۋبو (جاپونيا) ءۇشىنشى ورىندى قاناعات تۇتتى.

سپورتتىڭ بۇل تۇرىنەن كەلەسى جارىس 25 قاڭتاردا وتەدى.

قازىر قازاقستان دەلەگاتسياسى 1 التىن، 1 قولا مەدالمەن جالپى ەسەپتە 13-ساتىدا تۇر. كوش باسىندا تۇرعان يتاليانىڭ 7 التىن جۇلدەسى بار.

IV قىسقى جاسوسپىرىمدەر وليمپياداسىن Olympics.com Youtube ارناسىنان كورۋگە بولادى.