Taǵy bir qazaq faıteri UFC-ge qosyldy (VIDEO)

Jekpe-jek sheberi Bekzat Almahan UFC-men kelisimshartqa qol qoıdy. Ol álemdegi eń myqty promoýshende jeńil salmaqta, ıaǵnı 61 keli salmaqta oktagonǵa shyǵady.

Qazir UFC-de bul salmaqtyń chempıony – amerıkalyq Shon O’Mellı. Onyń jasy 29-da. Bıyl ol otyzǵa keledi. Buǵan deıin Sergeı Morozov ta Qazaqstannnyń atynan osy salmaqta tóbelesken.

Bekzat Almahanǵa kelsek, onyń jasy 26-da. Ol osyǵan deıin 18 ret jekpe-jekke shyǵyp, bireýinde ǵana qarsylasynan jeńilgen. 13 jekpe-jekti nokaýtpen aıaqtaǵan. Bekzat sońǵy eki jylda OCTAGON uıymdastyratyn jekpe-jek keshterinde kúsh synasty. Sonymen birge Bushido Qazaqstan, Zhekpe Zhek, Reseıdiń MMA Series pen BAÁ-niń UAE Warriors týrnırlerine qatysty.

Faıter týraly taǵy bir derekti aıtsaq, ol MMA-men 17 jasynan bastap aınalysa bastaǵan. Al negizgi sporty – karate. Qazir ony MMA-nyń aty ańyzǵa aınalǵan mamany Dánesh Dúngenbaev jattyqtyrady.

Bekzat – Dánesh Dúngenbaevtyń UFC-ge shyqqan ekinshi shákirti. Buǵan deıin Azat Maqsum UFC-men kelisimshartqa qol qoıyp, bir ret jekpe-jekke shyqqan edi.

4 aqpanda Azat Maqsum amerıkalyq Charlz Djonsonmen oktagonǵa shyǵady. Amerıkalyq faıter de OCTAGON-nan UFC-ge kelgen.

Dastan KENJALIN,

ASTANA