Kanvon-2024: Qazaqstan qysqy Olımpıadada alǵash ret altyn júlde aldy (FOTO)

Ońtústik Koreıada qysqy sport túrlerinen IV jasóspirimder Olımpıadasy máresine jetti.

19-qańtarda bastalǵan Olımpıadaǵa 78 elden 1803 sportshy keldi. Týnıs pen BAÁ eliniń sportshylary alǵash ret qysqy jasóspirimder Olımpıadasynda baq synady. Olar 7 sport túrinen (15 baǵdarlamada) 81 júlde jıyntyǵyn sarapqa saldy.

Al Qazaqstan namysyn sporttyń 5 túrinde (9 baǵdarlama) 41 jasóspirim qorǵady. Nátıjesinde el sportshylary 1 altyn, 2 qola medalmen jalpy esepte 20-orynǵa taban tiredi. Azııa qurlyǵynda alǵash ótken oıyndarda 32 memleket júldege ıe boldy.

Endi oqyrmannyń nazaryna ulttyq quramanyń jekelegen sport túrinen nátıjesine sholýdy usynamyz.

1.Kanvon Olımpıadasynyń alǵashqy kúni shańǵymen tuǵyrdan sekirý jarysynda Qazaqstan ánurany shyrqaldy. Ilıa Mızernyh 214 upaı jınap, qysqy jasóspirimder Olımpıadasynda chempıon atanǵan tuńǵysh qazaqstandyq sportshy atandy.

Osy kúni Alıona Svırıdenko 27-shi, Sofıa Shıshkına 29-shy, Ilıa Shılnıkov 30-oryn aldy. Aralas komandalyq saıysta Qazaqstan (Ilıa Mızernyh, Ilıa Shılnıkov, Sofıa Shıshkına men Alıona Svırıdenko) 13-satyǵa taban tiredi. Olar 491,3 upaı jınady.

2. Short-trekten Qazaqstan oıyndarǵa tolyq quramda (2 ul, 2 qyz) qatysqan 9 eldiń biri boldy. Munda Polına Omelchýk 1000 metrge jarysta qola júlde aldy. Sondaı-aq ol 1500 metrge jarysta fınalǵa shyqqanymen medal ala almady (6-oryn). Anastasııa Astrahanevanyń úzdik kórsetkishi V fınaly (6-oryn). Uldar arasynda Erasyl Shyńǵyshan men Meıirjan Tólegenniń jekeleı syndaǵy úzdik nátıjesi shırek fınal boldy. Estafetada Qazaqstan quramasy jartylaı fınalda Erasyl Shyńǵyshannyń súrinip qalýyna baılanysty jarysty aıaqtaı almaǵan.

3. Hokkeıden (3×3) ulttyq quramasy Aýstrııadan 6:5 esebimen basym túsip, qola júldeger atandy. Jasóspirimder Olımpıadasy 3×3 hokkeı alǵash ret qosylǵanyn aıta keteıik.

Qazaqstan toptyq kezeńde Polsha, Ispanııa, Ulybrıtanııa, Qytaıdyń Taıpeıin iri eseppen jeńdi. Alaıda Danııa, Aýstrııa, Latvııadan jeńilýge májbúr boldy. Soǵan qaramastan pleı-ofqa shyǵyp, jartylaı fınalda Latvııaǵa taǵy ese jiberdi.

4. Taý shańǵysynda el namysyn Aleksandra Skorohodova men Vladıslav Hohlov qorǵady. Aleksandranyń úzdik kórsetkishi 5-oryn (gıgant slalom). Al Vladıslavtyń jaqsy nátıjesi 19-saty (slalom).

5. Konkımen júgirýde ápkeli-sińlili Krıstına jáne Alına Shýmekovalar, Rýslan Jánadilov pen Mıhaıl Matrıýhın synǵa tústi. Olardyń jaqsy nátıjesi mynadaı:

Krıstına Shýmekova (7-oryn, 500 jáne 1500 m)

Alına Shýmekova 10-oryn (500 m)

Rýslan Janádilov (8-oryn, 1500 m)

Mıhaıl Matrıýhın 17-oryn (1500 m)

6. Osyǵan deıingi Oıyndarda eń kóp júlde alǵan bıatlonda bul júldesiz qaldyq. Aralas juptyq synda Ilııas pen Alema 10-shy bolsa, aralas komandalyq estafetada Qazaqstan 11-orynnan kórindi. Jekeleı syndaǵy jaqsy nátıje Kırıll Zotovtyń enshisinde (23-oryn, 12,5 km).

7. Frıstaıldyń mogýl túrinde Iýlııa Feklıstova 9-shy, al Denıs Rastrýba uldar arasynda 10-satydan kórindi. Komandalyq synda ekeýi 12-orynda qaldy.

8. Kıorlıngten ulttyq qurama (Ibragım men Mereı Tastemirler) toptyq kezeńnen shyǵa almady. Bul satyda olar aldyńǵy oıyndardyń júldegeri Italııadan basym tústi. Alaıda Aýstrııa, Germanııa, Shveıarııa men Danııa quramasyna ese jiberdi.

9. Shańǵymen jarysta Qazaqstan quramasy (Berik Boranbaev, Áýbákir Totanov, Mılana Mamedova, Vıoletta Mıtropolskaıa) estafetada 16-shy bolyp máre syzyǵyn kesti. Bul olardyń Alpensııa keshenindegi eń jaqsy nátıjesi. Jekeleı syndaǵy jaqsy kórsetkish Berik Boranbaev (22-oryn, erkin ádis) pen Vıoletta Mıtropolskaıada (25-oryn, klassıkalyq ádis).

Kanvon tórinde Qazaqstan sportshylary alǵash ret frıstaıl-mogýl, hokkeı (3×3) pen kıorlıngten júldege talasty. Barlyq 4 qysqy Olımpıadany qosa eseptegende, Qazaqstan jeńip alǵan medal sany 8-ge jetti (1 altyn, 1 kúmis, 6 qola). Ońtústik Koreıada Qazaqstan qorjynyna alǵashqy altyn medal tústi.

 

Shamken BAIYRBEK,

Kannyn — Ońtústik Koreıa

FOTO: Shamken BAIYRBEK, Nurǵalı JUMAǴAZY, Salı SABIROV