كونكيشىلەر الەم كۋبوگىندا تاريحي ناتيجە كورسەتتى

وسى دەمالىس كۇندەرى كونكيمەن جۇگىرۋدەن قازاقستان قۇراماسى كانادا مەن جاپونيادا وتكەن الەم كۋبوگى كەزەڭدەرىندە تاريحي ناتيجە كورسەتتى. ەلىمىزدىڭ قورجىنىنا ەكى التىن، ءۇش كۇمىس، التى قولا مەدال ءتۇسىپ، سپورتشىلارىمىز الەمدىك رەيتينگتە كوش باستادى.

2-4 اقپاندا كانادانىڭ كۆەبەك قالاسىندا ەرەسەكتەر اراسىندا وتكەن الەم كۋبوگىندا قازاقستان ايەلدەر قۇراماسى كوماندالىق سپرينتتە باق سىناپ، ەلىمىزدىڭ تاريحىندا تۇڭعىش رەت قولا جۇلدەگە يە بولدى. كوماندا قۇرامىندا تاجىريبەلى ەكاتەرينا ايدوۆا، جاسوسپىرىمدەر اراسىنداعى الەم چەمپيوناتىنىڭ ەكى دۇركىن جۇلدەگەرى الينا داۋرانوۆا مەن جاسوسپىرىمدەر اراسىنداعى الەم كۋبوگىنىڭ يەگەرى ينەسسا شۋمەكوۆا ونەر كورسەتتى. بۇل قۇراممەن العاش رەت جارىس الاڭىنا شىققان سپورتشىلارىمىز 1:29.16 ناتيجەسىن تىركەپ، ءۇشىنشى ورىنعا جايعاستى. نيدەرلاندى قۇراماسى كۋبوكتىڭ يەگەرى اتانسا، پولشا كومانداسى كۇمىس جۇلدەنى يەلەندى.

بۇل جارىسپەن قاتار جاپونيانىڭ حاتينوحە قالاسىندا كونكيمەن جۇگىرۋدەن جاسوسپىرىمدەر مەن نەو-سەنورلار اراسىنداعى الەم كۋبوگىنىڭ ءۇشىنشى كەزەڭى بولدى.

جارىستىڭ ءبىرىنشى كۇنى قازاقستان كونكيشىلەر التى مەدالدى جەڭىپ الدى.

نەو-سەنورلار اراسىنداعى «Team Sprint» كوماندالىق جارىسىندا ايەلدەر قۇراماسى  التىن (1 مينۋت 33.82 سەكۋند) مەدالگە، ەرلەر كومانداسى قولا (1:28.02) جۇلدەگە يە بولدى.

جاسوسپىرىمدەر اراسىنداعى «Team Sprint»  كوماندالىق جارىسىندا ايەلدەر – كۇمىس (1:31.47)، ەرلەر – قولا (1:23.89) جۇلدەنى جەڭىپ السا، 1000 مەترگە جۇگىرۋدە (نەو-سەنورلار) مارگاريتا ارتەمەۆا – كۇمىس (1:22.03)، ماريا كۋزنەتسوۆا – قولا (1:23.84) مەدالدى يەلەندى.

جارىستىڭ ەكىنشى كۇنى سپورتشىلارىمىز ءتورت مەدال جەڭىپ الدى.

500 مەترگە جۇگىرۋدە (نەو-سەنورلار) مارگاريتا ارتەمەۆا التىن (40.86 سەكۋند) جۇلدەنى موينىنا تاقسا، ماريا كۋزنەتسوۆا قولا (41.38) جۇلدەگەر اتاندى.

1500 مەترگە جۇگىرۋدە (نەو-سەنورلار) الەنا ليفاتوۆا مارەگە ءۇشىنشى بولىپ كەلدى. ونىڭ ناتيجەسى 2 مينۋت 12.01 سەكۋند.

جاپپاي ستارتتا (نەو-سەنورلار) مارگاريتا ارتەمەۆا فينيشكە 6 مينۋت 48.84 سەكۋندتا ەكىنشى بولىپ جەتتى.

كونكيمەن جۇگىرۋ سپورتىنان 2023/2024 جىلعى ماۋسىمى ءبىز ءۇشىن جاقسى بولىپ جاتىر. كۆەبەكتە قىزدارىمىز العاش رەت كوماندالىق سپرينتتە قولا جۇلدەگەر اتانىپ وتىر. بۇل قۋانىشىمىزبەن قاتار، جاپونيادان جاسوسپىرىمدەر كومانداسى دا جەڭىستى حابارمەن قۋانتتى. الەم كۋبوگى جارىسىندا بىردەن 10 مەدال الدىق. بۇل دەگەنىمىز كونكيمەن جۇگىرۋ سپورتىنىڭ ەلىمىزدە قارقىندى دامىپ كەلە جاتقانىنىڭ ايقىن كورىنىسى. ءۇمىت ارتىپ وتىرعان وسكەلەڭ ۇرپاعىمىز بار. ناتيجە كورسەتىپ جۇرگەن مىقتى سپورتشىلارىمىز جانە بار.

ۇلتتىق قۇراماعا الداعى وليمپيالىق ماۋسىمدارعا رەزەرۆ دايىن دەپ سەنىمدى تۇردە ايتا الامىز. قازىر الەمدىك رەيتينگتىڭ بىرنەشە ديستانتسياسىندا كوش باستاپ تۇرمىز. وسى قارقىننان قالماي، كەلە جاتقان الەم چەمپيوناتىندا جاقسى ناتيجە كورسەتۋگە بارىنشا تىرىسامىز، — دەدى كەزىندە وليمپياداعا قاتىسقان  كونكيمەن جۇگىرۋدەن قر مەملەكەتتىك جاتتىقتىرۋشىسى، كەنجەش سارسەكەنوۆا.

سونداي-اق، جاپونيادا 2023/2024 جىلعى الەم كۋبوگىنىڭ بارلىق كەزەڭدەرىندەگى ۇپايلار قوسىندىسى بويىنشا ماۋسىمنىڭ ەڭ مىقتى سپورتشىلارى انىقتالدى. بۇل تىزىمدە وتانداستارىمىز كوش باستاپ، جەڭىس تۇعىرىنان كورىندى.

اتاپ ايتقاندا، قازاقستان ايەلدەر اراسىنداعى كوماندالىق جارىستا ءبىرىنشى، ال ەرلەر اراسىنداعى كوماندالىق جارىستا ەكىنشى ورىندى الدى.

جاپپاي ستارتتا ماريا كۋزنەتسوۆا ءۇشىنشى ورىننان كورىنسە، مارگاريتا ارتەمەۆا 500 مەترگە جۇگىرۋدە الدىنا جان سالعان جوق. وسى سىندا ينەسسا شۋمەكوۆا مارەگە ءۇشىنشى بولىپ جەتتى.

1000 مەترگە جۇگىرۋدەينەسسا شۋمەكوۆا ەكىنشى، الەنا ليفاتوۆا ءۇشىنشى بولىپ كەلدى.

جاسوسپىرىمدەردىڭ كوماندالىق جارىسىندا قىزدار ەكىنشى ورىنعا تابان تىرەدى.

حالىقارالىق كونكيشىلەر وداعى (ISU) ماۋسىمنىڭ ۇزدىكتەرى دەپ تانىعان سپورتشىلارعا ديپلومدار مەن اقشالاي سەرتيفيكاتتار تابىس ەتتى.

 

مارجان قالىموۆا،

قازاقستان كونكيشىلەر وداعىنىڭ ءباسپاسوز حاتشىسى