SportPress.kz قازاقستان سپورت جاڭالىقتارى
قازاقستان سپورتشىلارىن جاسوسپىرىمدەر وليمپياداسىنا باستاپ بارعان دەلەگاتسيا مۇشەلەرىنەن جاساقتالعان وليمپياداعا دايىندىق جۇمىستارىنا ارنالعان شتاب ءوز جۇمىسىن ودان ءارى جالعاستىرىپ جاتىر، دەپ حابارلادى تۋريزم جانە سپورت مينيسترلىگى.
بۇگىن شتاب جازعى وليمپيادا مەن پاراليمپياداعا دايىندىقتى باستادى. XXXIII جازعى وليمپيا ويىندارى 26 شىلدە مەن 11 تامىز ارالىعىندا وتەدى. تورتجىلدىقتىڭ باستى دوداسىنا الەمنىڭ 205 ەلىنەن 10 مىڭنان استام سپورتشى قاتىسادى دەپ جوسپارلانعان. پاريجدەگى دودادا 32 سپورت تۇرىنەن 329 مەدال جيىنتىعى ساراپقا سالىنادى.
قازىرگى تاڭدا قازاقستان ۇلتتىق قۇراماسىنىڭ قورجىنىندا سپورتتىڭ 8 تۇرىنەن پاريج وليمپياداسىنىڭ 19 ليتسەنزياسى بار. سپورتشىلار ساداق اتۋدان — ءتورت، ۆەلوشوسسەدەن — ءۇش، نىسانا كوزدەۋدەن — بەس، قازىرگى بەسسايىس پەن بوكستان ەكى-ەكىدەن، گرەك-ريم كۇرەسى، ەركىن كۇرەس پەن سپورتتىق گيمناستيكادان ءبىر-ءبىر ليتسەنزيانى جەڭىپ الدى.
وليمپيا ويىندارىنا دەيىن 69 ليتسەنزيالىق جارىس قالدى. ونىڭ ىشىندە 5 الەم چەمپيوناتى، 7 ازيا چەمپيوناتى جانە 57 رەيتينگتىك تۋرنير بار.
بيىلعى جىلدىڭ باستى جارىسى بۇل — پاريجدەگى جازعى وليمپيالىق ويىندار. شتابتىڭ الداعى ماقساتى – حالىقارالىق تۋرنيرلەردە سپورتشىلاردىڭ ءساتتى ونەر كورسەتۋىنە جاعداي جاساۋ جانە مۇمكىندىگىنشە كوپ ليتسەنزيانى جەڭىپ الۋ. قۇراما كوشباسشىلارى ءار سپورت ءتۇرىنىڭ ەرەكشەلىگى، سپورتشىنىڭ قاجەتتىلىگى، مەديتسينالىق-بيولوگيالىق تۇرعىدا قامتاماسىز ەتىلگەنى، ونىڭ ىشىندە فيزيوتەراپيا، وڭالتۋ مەن جاراقاتتاردىڭ الدىن الۋ، پسيحولوگيالىق قولداۋ جانە جارىسقا دايىندىق كەزىندە كۇيزەلىستى جەڭۋ سياقتى جاعدايلار ەسكەرىلگەن جەكە جوسپار بويىنشا دايىندالادى. سونىمەن قاتار شتاب سپورتشىلار مەن دەلەگاتسيا مۇشەلەرىن كەرەك-جاراقپەن قامتاماسىز ەتۋ ماسەلەسىن قاراستىرىپ جاتىر، — دەدى وليمپياداعا دايىندىق جونىندەگى شتاب باسشىسى ەلسيار قاناعاتوۆ.
شتاب –تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراتسيالارىنىڭ وليمپياداعا بىرىگىپ جۇمىس ىستەۋ ءۇشىن قۇرىلعان ۋاكىلەتتى ورگان. ونىڭ نەگىزگى جۇمىسى – سپورتشىلاردىڭ الداعى جارىستارعا ساپالى دايىندىعىن قامتاماسىز ەتۋ.
شتاب بارلىق كەشەندى جارىستار اياقتالعانعا دەيىن تۇراقتى نەگىزدە جۇمىس ىستەيتىن بولادى.
