قازاقستان العاش رەت سۋ سپورتىنان التىن جۇلدە الدى

كاتاردىڭ استاناسى – دوحا قالاسىندا سۋ سپورتى تۇرلەرىنەن ءوتىپ جاتقان الەم چەمپيوناتىندا ەلىمىزدىڭ سپورتشىلارى العاش رەت التىن جۇلدەنى جەڭىپ الدى.

تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، ەدۋارد كيم مەن نارعىز بولاتوۆا جۇبى تەحنيكالىق باعدارلامادا چەمپيون اتانىپ، ءانۇرانىمىزدى شىرقاتتى. ۇلتتىق قۇرامانىڭ قوس سپورتشىسى فينالدا 228،0050 ۇپاي جينادى. تورەشىلەر باعدارلاما قيىندىعى جاعىنان ولاردىڭ ونەرىن جوعارى باعالادى (31.5000 بالل). بۇل – قازاقستان وكىلدەرىنىڭ سۋ سپورتى تۇرلەرىنەن الەم چەمپيوناتىندا جەڭىپ العان العاشقى التىن مەدالى. ءبىرىنشى جۇلدەنى بىلتىر جاپونيادا وتكەن الەم چەمپيوناتىندا تەحنيكالىق باعدارلامادا ەدۋارد كيم جەڭىپ العان بولاتىن. ول قولا مەداليست بولدى.

كۇمىس مەدال قىتاي قۇراماسىنا (ۆەنتاو چەن مەن حاويۋي شي)، قولا جۇلدە مەكسيكا كومانداسىنا (ميراندا حيمەنەس پەن ديەگو كارريلو) بۇيىردى.

ەدۋارد كيم پەن نارعىز بولاتوۆا الداعى كۇندەرى قازاقستان قورجىنىن تاعى ءبىر جۇلدەمەن تولىقتىرا الادى. ول ءۇشىن ەركىن باعدارلامادا وسى قارقىننان تايماۋى كەرەك.

قازىر قازاقستان جالپى ەسەپتە 1 التىن جۇلدەمەن 5-ورىنعا كوتەرىلدى. كوش باسىندا قىتاي تۇر.

جالپى، الەم چەمپيوناتىندا 17 مەملەكەت جۇلدەگە يە بولدى.

داستان كەنجالين،

استانا