باقتيار ارتاەۆقا ۆەل باركەر كۋبوگى قايتارىلادى

جاعىمدى جاڭالىق جەتتى. كوپتەن كۇتكەن جاڭالىق. باقتيار ارتاەۆقا الداعى ايدا ۆەل باركەر كۋبوگى تابىس ەتىلەدى. ءدال قازىر ونىڭ دۋبليكاتى دايىندالىپ جاتىر. ەستەرىڭىزدە بولسا، 2021 جىلى سەربياداعى الەم چەمپيوناتىندا باقتيار ارتاەۆ وسى جۇلدەسىن رەسمي تۇردە حالىقارالىق بوكس فەدەراتسياسىنا تاپسىرعان بولاتىن. سول كەزدە وعان وتە ساپالى كوشىرمەسى جاسالىپ، وزىنە بەرىلەتىنى ايتىلدى. مىنە، سول ۋادە اراعا ۇزاق ۋاقىت سالىپ، ەندى ورىندالايىن دەپ جاتىر.

وسى تۇرعىدا كوكەيدە ءبىراز سۇراق تۋىندايدى. ويتكەنى، ۆەل باركەر كۋبوگى 1936 جىلدان بەرى ءار وليمپيادادا ەڭ ۇزدىك بوكسشىعا تابىس ەتىلىپ ءجۇر. ياعني، 4 جىل سايىن قولدان قولعا ءوتىپ وتىرادى. سايكەسىنشە، ونىڭ جيەگىنە جاڭا يەسىنىڭ ەسىمدەرى ويىلىپ جازىلادى. مىنە، وسى سىيلىق قالاي باقتيار ارتاەۆتىڭ قولىندا قالىپ قويدى؟ ودان كەيىنگى دە ۇزدىك بوكشىلارعا بەرىلدى ەمەس پە؟ سونىمەن قاتار حالىقارالىق بوكس فەدەراتسياسى نەگە ارتاەۆتىڭ جۇلدەسىن مۋزەيگە الدى؟

سويتسەم، ءيا، سىيلىق، راسىمەن دە، 1936 جىلدان بەرى بەرىلىپ كەلەدى. بىراق، 2004 جىلى ول قولدان قولعا بەرىلمەيتىن بولعان.  ياعني، ودان كەيىنگى جازعى ويىنداردا جاڭا كۋبوك دايىندالىپ، ەڭ ۇزدىك بوكسشىعا تاپسىرىلاتىن بولدى. ال، 90 جىلعا جۋىق تاريحى بار نەگىزگى كۋبوك باقتيار ارتاەۆتىڭ ەنشىسىندە قالدى. مىنە، وسىنداي قىزىقتى جاعداي. تاريح قوي. قۇندى سىيلىق ۇزاق كەلىسسوزدەردەن كەيىن حالىقارالىق بوكس فەدەراتسياسىنا بەرىلدى.

بىرەۋ بىلسە، بىرەۋ بىلمەس، ناۋرىزدا استانادا باقتيار ارتاەۆتىڭ جۇلدەسىنە ارنالعان حالىقارالىق تۋرنير وتەدى. مىنە، وسى بوكس باسەكەسىنە دەيىن الگى كوشىرمە دايىن بولادى دەگەن ۇمىتتەمىز. حالىقارالىق بوكس فەدەراتسياسىنىڭ دا ماقساتى وسى. كۋبوك ءتۋرنيردىڭ اشىلۋ سالتاناتىندا رەسمي تۇردە تابىس ەتىلمەك. ال، ەندى ونى كىم اكەلىپ بەرەتىنى ازىرگە جۇمباق بولىپ وتىر.

اسلان قاجەنوۆ،

سەيداحمەت بەردىقۇلوۆ اتىنداعى سىيلىقتىڭ لاۋرەاتى،

استانا

ءبىزدىڭ انىقتاما: باقتيار ارتاەۆ — 2004 جىلى گرەكيانىڭ استاناسى – افينا قالاسىندا وتكەن جازعى وليمپيالىق ويىنداردى 69 كەلىگە دەيىنگى سالماقتا جەڭىپ العان قازاقتىڭ اتاقتى بوكسشىسى، حالىقارالىق سپورت شەبەرى، 1-دارەجەلى بارىس وردەنىنىڭ يەگەرى.

وعان دەيىن ۆەل باركەر كۋبوگىن 1996 جىلى اقت-تىڭ اتلانتا قالاسىندا جالاۋى جەلبىرەگەن وليمپيادادا 81 كەلىدە، ياعني جارتىلاي ورتا سالماقتا ۆاسيلي جيروۆ يەلەنگەن بولاتىن. ال باقتيار ارتاەۆتان كەيىن 2012 جىلى لوندوندا وتكەن وليمپيادادا 69 كەلىگە دەيىنگى سالماقتا سەرىك ساپيەۆ كۋبوكتىڭ يەگەرى اتاعىنا لايىق دەپ تانىلدى.

ۆەل باركەر كۋبوگى — 1936 جىلدان باستاپ وليمپيالىق ويىنداردىڭ ەڭ تەحنيكالى بوكسشىسىنا بەرىلەتىن جۇلدە. كۋبوك 1920 جىلى اعىلشىن بوكسشىسى، حالىقارالىق اۋەسقوي بوكس فەدەراتسياسىنىڭ العاشقى قۇرمەتتى حاتشىسى ۆەل باركەردىڭ قۇرمەتىنە تاعايىندالعان.

كۋبوك — ايبا -نىڭ جەكەمەنشىگى. ول وليمپيالىق ويىنداردا العان ورىنىنا قاراماستان ەڭ مىقتى تەحنيكا كورسەتكەن بوكسشىعا تابىس ەتىلەدى. جەڭىمپازعا كۋبوكتىڭ كوشىرمەسى مەن ايبا-نىڭ ديپلومى بەرىلەدى. كۋبوك جارىستار بىتكەننەن سوڭ، ءبىر كۇننەن كەيىن، ارنايى تسەرەمونيا كەزىندە ايبا مۇشەلەرى مەن شاقىرىلعان قوناقتاردىڭ كوزىنشە تابىس ەتىلەدى.

سالتاناتتى ءىس-شاراعا كۋبوكقا ۇمىتكەر بولعان بارلىق سپورتشىلار شاقىرىلادى. كۋبوكقا جەڭىمپازدىڭ ەسىمى، سالماعى، ەلى جانە وليمپيادا وتكەن قالانىڭ اتاۋى قاشالىپ جازىلادى. كۋبوك يەگەرى كۋبوكتى ءوز ەلىنىڭ ۇلتتىق بوكس فەدەراتسياسىنا كەلەسى وليمپيالىق ويىندارعا دەيىن ساقتاۋعا وتكىزەدى.

ۇلتتىق بوكس فەدەراتسياسى ايبا-عا كۋبوكتى قاۋىپسىزدىكتى ساقتاۋ جونىندە كەپىلدەمە بەرىپ، ايبا-نىڭ ەسەپشوتىنا كەپىلدىك رەتىندە اقشا اۋدارادى. كەلەسى وليمپيالىق ويىنداردىڭ باستالۋىنا كەم دەگەندە جەتى كۇن قالعا دەيىن كۋبوك وليمپيادا بولاتىن قالاعا، ايبا-نىڭ اتقارۋشى كوميتەتىنىڭ مۇشەلەرىنە جەتكىزىلۋى كەرەك. كۋبوك يەگەرى ايبا تاراپىنان كەلەسى وليمپياداع قۇرمەتتى قوناق رەتىندە شاقىرىلىپ، كۋبوكتى كەلەسى بوكسشىعا تاپسىرۋ راسىمىنە قاتىسادى. ەگەر كۋبوكتى قاتارىنان ءۇش رەت ءبىر ەلدىڭ بوكشىلارى السا، وندا كۋبوك سول ەلدىڭ ۇلتتىق بوكس فەدەراتسياسىنىڭ مەنشىگىنە وتەدى.