الەمگە ايگىلى جەلاياق جول اپاتىنان قازا تاپتى

بۇگىن تۇندە الەمگە ايگىلى مارافونشى-رەكوردشى كەلۆين كيپتۋم جول اپاتىنان قازا تاپتى. ونىمەن بىرگە ءبىر اۆتوكولىكتە جاتتىقتىرۋشىسى جەرۆە حاكيزيمانا دا بولعان. ول دا جول اپاتىنان كوز جۇمدى.

كەلۆين كيپتۋم مەن ونىڭ جاتتىقتىرۋشىسىنىڭ قازاسىنا بۇكىل الەم ەسەڭگىرەپ قالدى.

قارا قۇرلىق قارا جامىلدى.

بەلگىلى مارافونشى، جۋرناليست ەرەنعايىپ قۋاتاي ۇلىنىڭ ايتۋىنشا، 2022 جىلى كۇزدە ۆالەنسيا مارافونىندا قارا ءۇزىپ كەلگەن كەلۆين كيپتۋمدى ەشكىم بىلمەگەن. ويتكەنى، بۇل ونىڭ ءبىرىنشى مارافونى ەدى. 2023 جىلى كوكتەمدە لوندون مارافونىن 2:01:25 ناتيجەسىمەن جۇگىرىپ ءوتىپ، چەمپيون اتانعاندا اڭىز مارافونشى ەليۋد كيپچوگەگە باسەكەلەس مارافونشىنىڭ كەلگەنىن الەم قاۋىمداستىعى جارىسا جازعان-تىن.

وسى جىلى قازان ايىندا چيكاگو مارافونىندا الەم رەكوردتىن تالقان قىلعان كيپتۋم مەگاجۇلدىزعا اينالىپ شىعا كەلدى. 2:00:35! بۇل ونىڭ ءۇشىنشى ءارى سوڭعى مارافونى ەكەن.

جاقىندا عانا جاتتىقتىرۋشىسى ەكەۋى ساۋىردە وتەتىن روتتەردام مارافونىن 2:00:00-عا جەتكىزبەي جۇگىرىپ، ءوز رەكوردىن جاڭارتىپ قانا قويماي جيىرما ءبىر عاسىردا ادامزات بالاسى جەتپەگەن ناتيجەگە جەتەمىز دەسىپ ەدى… دەگەنىنە جەتپەي كەتتى…

18 جاسقا دەيىن كيپتۋم وتانى كەنياداعى ءتۇرلى جارىستارعا جالاڭاياق قاتىسقان. كروسسوۆكي ساتىپ الۋعا اقشاسى بولماعان. 2018 جىلى جەرۆە حاكيزيمانا سپورتتىق كارەراسىن ءتامامداپ، قوي باعىپ جۇرگەن 19 جاستاعى كيپتۋمدى باپتاعان. بەس-اق جىلدا بۇكىل الەمدى اۋزىنا قاراتتى، — دەدى ول.

كەلۆين كيپتۋم نەبارى 24 جاسىندا تالايدىڭ كۋميرىنە اينالىپ ۇلگەرگەن ەدى. ونىڭ قازاسىنا افريكا عانا ەمەس، تۇتاس التى قۇرلىق مارافون قاۋىمداستىعى ەسەڭگىرەپ قالدى. اۋزىمەن قۇس تىستەگەن جەلاياق مىنا جۇمىر جەرگە سىيماي كەتتى.

داستان كەنجالين،

استانا