Álemge áıgili jelaıaq jol apatynan qaza tapty

Búgin túnde álemge áıgili marafonshy-rekordshy Kelvın Kıptým jol apatynan qaza tapty. Onymen birge bir avtokólikte jattyqtyrýshysy Jerve Hakızımana da bolǵan. Ol da jol apatynan kóz jumdy.

Kelvın Kıptým men onyń jattyqtyrýshysynyń qazasyna búkil álem eseńgirep qaldy.

Qara qurlyq qara jamyldy.

Belgili marafonshy, jýrnalıst Erenǵaıyp Qýataıulynyń aıtýynsha, 2022 jyly kúzde Valensııa marafonynda qara úzip kelgen Kelvın Kıptýmdy eshkim bilmegen. О́ıtkeni, bul onyń birinshi marafony edi. 2023 jyly kóktemde London marafonyn 2:01:25 nátıjesimen júgirip ótip, chempıon atanǵanda ańyz marafonshy Elıýd Kıpchogege básekeles marafonshynyń kelgenin álem qaýymdastyǵy jarysa jazǵan-tyn.

Osy jyly qazan aıynda Chıkago marafonynda álem rekordtyn talqan qylǵan Kıptým megajuldyzǵa aınalyp shyǵa keldi. 2:00:35! Bul onyń úshinshi ári sońǵy marafony eken.

Jaqynda ǵana jattyqtyrýshysy ekeýi sáýirde ótetin Rotterdam marafonyn 2:00:00-ǵa jetkizbeı júgirip, óz rekordyn jańartyp qana qoımaı jıyrma bir ǵasyrda adamzat balasy jetpegen nátıjege jetemiz desip edi… Degenine jetpeı ketti…

18 jasqa deıin Kıptým otany Kenııadaǵy túrli jarystarǵa jalańaıaq qatysqan. Krossovkı satyp alýǵa aqshasy bolmaǵan. 2018 jyly Jerve Hakızımana sporttyq karerasyn támamdap, qoı baǵyp júrgen 19 jastaǵy Kıptýmdy baptaǵan. Bes-aq jylda búkil álemdi aýzyna qaratty, — dedi ol.

Kelvın Kıptým nebári 24 jasynda talaıdyń kýmırine aınalyp úlgergen edi. Onyń qazasyna Afrıka ǵana emes, tutas alty qurlyq marafon qaýymdastyǵy eseńgirep qaldy. Aýzymen qus tistegen jelaıaq myna jumyr jerge syımaı ketti.

Dastan KENJALIN,

ASTANA