وليمپيادا كيىمىنىڭ ديزاينى بەكىتىلەدى – جەدەل شتاب

مەملەكەت باسشىسىنىڭ تاپسىرماسى بويىنشا قۇرىلعان وليمپيالىق ويىندارعا دايىندىق شتابى ءوز جۇمىسىن جالعاستىرىپ جاتىر، دەپ حابارلادى تۋريزم جانە سپورت مينيسترلىگى.

بۇگىن جەدەل شتابتا تۋريزم جانە سپورت مينيسترلىگى سپورتتى دامىتۋ ديرەكتسياسى ۇلتتىق وليمپيادا كوميتەتى وكىلدەرىمەن كەزدەستى.

جيىندا بىرقاتار ماسەلە تالقىلاندى. بۇگىندە قازاقستان قۇراماسىنىڭ قورجىنىندا سپورتتىڭ 8 ءتۇرى بويىنشا 19 جولداما بار (ساداق اتۋ — 4، تاس جولداعى ۆەلوسپورت — 3، نىسانا كوزدەۋ — 5، قازىرگى بەسسايىس — 2، بوكس – 2، گرەك-ريم كۇرەسى — 1، ەركىن كۇرەس — 1، سپورتتىق گيمناستيكا — 1). جوسپار بويىنشا 25 سپورت ءتۇرى بويىنشا ليتسەنزيالاردىڭ سانىن 90-عا دەيىن جەتكىزۋ مىندەتى تۇر. سونداي-اق، جۇلدەگە ۇمىتكەر 54 سپورتشىدان تۇراتىن ءتىزىم جاساقتالدى.

قۇراما كوشباسشىلارى ءار سپورت ءتۇرىنىڭ ەرەكشەلىگىن ەسكەرە وتىرىپ، جەكە جوسپار بويىنشا دايىندالادى. ءبىر سوزبەن ايتقاندا ولار ەشتەڭەگە مۇقتاج بولمايدى. وليمپيادا الدىنداعى تەستىلىك جارىستارعا قاتىسۋ دا ماڭىزدى ەكەنى تىلگە تيەك ەتىلدى. ءار سپورت ءتۇرىنىڭ جارىس كەستەسىنە سايكەس، كوماندالاردىڭ پاريجگە ۇشىپ بارۋ ۋاقىتى بەكىتىلەتىن بولدى.

سونىمەن قاتار، ۇلتتىق قۇراما سپورت كيىمى ۇلگىسىنىڭ ديزاينىن بەكىتىپ، ونى دايىنداۋ ەرەكشە نازاردا بولاتىنى ەسكەرىلدى.

2024 جىلعى 17 ساۋىردە بۇكىل ەل بويىنشا «وليمپياداعا 100 كۇن» ءىس-شاراسى وتەدى. ايتۋلى كۇنگە وراي فلەش-موبتار مەن سپورتتىق جارىستار ۇيىمداستىرىلادى.

تورتجىلدىقتىڭ باستى دوداسى 26 شىلدە مەن 11 تامىز ارالىعىندا فرانتسيا استاناسى پاريجدە وتەدى. وعان الەمنىڭ 205 ەلىنەن 10 مىڭنان استام سپورتشى قاتىسىپ، 32 سپورت تۇرىنەن 329 مەدال جيىنتىعى ساراپقا سالىنادى.