استاناعا پاريج وليمپياداسىنىڭ بويتۇمارى كەلدى

تۋريزم جانە سپورت ءمينيسترى ەرمەك مارجىقپاەۆ فرانتسيانىڭ قازاقستانداعى توتەنشە جانە وكىلەتتى ەلشىسى ديدە كانەسسپەن كەزدەستى، دەپ حابارلادى ۆەدومستۆو.

كەزدەسۋ پاريجدەگى جازعى وليمپيادا جانە پاراليمپياداعا دايىندىق جونىندەگى شتابتا بولدى.

وندا ەكى ەلدىڭ وكىلدەرى الداعى وليمپيالىق ويىنداردى ۇيىمداستىرۋ مەن وتكىزۋدى تالقىلادى. فرانتسيا ەلشىسى مينيسترگە  وليمپيادانىڭ رەسمي بويتۇمارىن تابىس ەتىپ، استانادا پاريجدەگى ويىندارعا ارنالعان مۋرال سالۋ تۋرالى جوسپارىن ايتتى.

فرانتسيا 2022 جىلدان بەرى دۇرمەكتى دودانىڭ قارساڭىندا وليمپيادا قاعيداتتارىن ناسيحاتتاۋ ماقساتىندا «الەم بويىنشا ەستافەتا» سپورتتىق ءىس-شاراسىن وتكىزىپ كەلەدى. مينيسترلىك بۇل باستامانى جىل سايىن قولدايدى.  بيىل ناۋرىز ايىنا جوسپارلانعان ەستافەتانى ۇيىمداستىرۋعا كومەكتەسۋگە دايىن. مينيستر وسى ءىس-شارا كەزىندە  پاريجدەگى وليمپياداعا بيلەت ۇتىسىن ۇيىمداستىرۋدى ۇسىندى.

كەيىنگى جىلدارى قازاقستان مەن فرانتسيا سپورتشىلارى ءتۇرلى دەڭگەيدەگى جارىستارعا قاتىسىپ، بىرلەسكەن وقۋ-جاتتىعۋ جيىندارىن وتكىزىپ كەلەدى. قازاقستان قۇراماسى 2-6 اقپاندا پاريج قالاسىندا وتكەن دزيۋدودان Grand Slam جارىسىنا قاتىسىپ، قولا مەدال جەڭىپ الدى. ءۇش دۇركىن وليمپيادا چەمپيونى، 12 دۇركىن الەم چەمپيونى، 5 دۇركىن ەۋروپا چەمپيونى تەددي رينەر قازاقستان قۇراماسىمەن بىرگە وقۋ-جاتتىعۋ جيىندارىنا قاتىستى.

مينيستر الماتى وبلىسىنداعى رەسپۋبليكالىق وليمپيادالىق دايىندىق بازاسىندا ەكى ەل سپورتشىلارى اراسىندا بىرلەسكەن وقۋ-جاتتىعۋ جيىندارىن وتكىزۋگە نيەتتى ەكەنىن جەتكىزدى. سونداي-اق ۆەدومستۆو باسشىسى فرانتسيالىق دەلەگاتسيانى جانە سپورتشىلارىن V دۇنيەجۇزىلىك كوشپەندىلەر ويىندارىنا قاتىسۋعا شاقىردى.

سونداي-اق ەرمەك مارجىقپاەۆ ىنتىماقتاستىقتىڭ باسىم باعىتتارىنىڭ ءبىرى تۋريزم ەكەنىن اتاپ ءوتتى.

فرانتسيا – بۇكىل الەمدەگى تۋريستەر ءۇشىن ەڭ تارتىمدى ەلدىڭ ءبىرى. كوپتەگەن مۋزەي، ورتاعاسىرلىق عيماراتتار، تابيعي لاندشافتتىڭ تاڭعاجايىپ ارالۋانداعى كەز كەلگەن ءتۋريستى بەي-جاي قالدىرمايتىنى ءسوزسىز. ءبىزدىڭ ەلىمىز دە قولايلى گەوگرافيالىق جاعدايعا يە ەكەنىن ايتقىم كەلەدى. ەرەكشە قورعالاتىن تابيعي ايماقتار ەل اۋماعىنىڭ 10%-دان استام جەرىن الىپ جاتىر. قازاقستاندا زاماناۋي تۋريسكە قاجەت دۇنيەنىڭ ءبارى بار دەپ سەنىممەن ايتا الامىن. ءبىز فرانتسيادان كەلگەن تۋريستەردى قابىلداۋعا جانە ەلىمىزدىڭ بىرەگەي تابيعاتىن كورسەتۋگە دايىنبىز، — دەدى ەرمەك مارجىقپاەۆ.

مينيستر قازاقستان مەن فرانتسيا اراسىنداعى تۋريستىك اعىمدى ودان ءارى ۇلعايتۋ ءۇشىن تىكەلەي رەيستەردى ىسكە قوسۋ جانە قازاقستان ازاماتتارىنا تۋريستىك ۆيزالار بەرۋ ءراسىمىن جەڭىلدەتۋ مۇمكىندىگىن قاراستىرۋدى ۇسىندى.

كەزدەسۋ سوڭىندا فرانتسيا ەلشىسى ديدە كانەسس ەكى ەلدىڭ تۋريزم جانە سپورت سالاسىنداعى ىنتىماقتاستىعىنا قىزىعۋشىلىق ءبىلدىرىپ، قازاقستان سپورتشىلارىنا پاريجدەگى وليمپيا ويىندارىندا تابىستى ونەر كورسەتۋىن تىلەدى.