«بولاشاق ويىندارى»: قازاقستان بىرنەشە سايىستا جەڭىمپاز اتاندى

تاتارستاننىڭ قازان قالاسىندا 21 اقپاندا باستالعان «بولاشاق ويىندارى» جارىسى اياقتالدى.

وعان 12-62 جاس ارالىعىنداعى 2 مىڭنان استام ادام قاتىسىپ، تسيفرلىق جانە كلاسسيكالىق سپورتتى بىرىكتىرەتىن 21 يننوۆاتسيالىق فيدجيتال ديستسيپلينالارى بويىنشا سىنعا ءتۇستى، دەپ حابارلادى تۋريزم جانە سپورت مينيسترلىگى.

جالپى، العاش رەت ۇيىمداستىرىلعان سايىسقا جەر-جۇزىنەن كەلگەن ەلدەردىڭ 294 كومانداسى قاتىستى. ءتۋرنيردىڭ جۇلدە قورى 10 ملن دوللارى بولدى.

جارىستارعا گەيمدەۆ، ەسپورت، روبوتوتەحنيكا (درون جارىسى جانە روبوت شايقاستارى)، كەڭەيتىلگەن جانە ۆيرتۋالدى شىندىق، اقپاراتتىق تەحنولوگيالار جانە جاساندى ينتەللەكت بويىنشا ازىرلەمەلەر كىردى. جالپى تۋرنير 21 ديستسيپلينا بويىنشا (16 نەگىزگى جانە 5 كەڭەيتىلگەن باعدارلامادا) ءوتتى. وعان 13 ءپان بويىنشا 48 وتانداسىمىز قاتىستى. بارلىعى 236 سپورتشى العاشقى «بولاشاق ويىندارىنىڭ» جەڭىمپازدارى مەن جۇلدەگەرلەرى اتاندى. ولاردىڭ اراسىندا رەسەي، قىتاي، ءۇندىستان، بەلارۋس، وڭتۇستىك كورەيا، يسپانيا، ۋرۋگۆاي، فيليپپين، ارگەنتينا، ەكۆادور، كولۋمبيا سپورتشىلارى بولدى. قازاقستان سپورتشىلارى دا ويىندا جاقسى قىرىنان كورىنىپ، «بولاشاق ويىندارىنان» ءتۇرلى ديستسيپلينالاردان مەدالدار جيىنتىعىن جەڭىپ الدى.

قازاقستاندىقتار جاقسى ناتيجە كورسەتتى.  «بولاشاق ويىندارىنا» قاتىسىپ، وتە پايدالى تاجىريبە الدىق. ءبىز قازاقستانداعى كيبەرسپورت ينفراقۇرىلىمىن ودان ءارى جەتىلدىرۋدى جالعاستىرامىز. ءوزىمىزدىڭ كيبەرسپورتشىلارىمىزدان تاعى دا جەڭىستەر مەن قىزىقتى دا تارتىستى ويىندار كۇتەمىز، — دەدى تۋريزم جانە سپورت ءمينيسترى ەرمەك مارجىقپاەۆ.

ويىندار كەزىندە  xGOD كومانداسىنىڭ قۇرامىندا بەس وتانداسىمىز ونەر كورسەتتى. Counter-Strike 2 ويىنى مەن لازەرتاگ بويىنشا «بولاشاق ويىندارى 2024» چەمپيوناتىندا جەڭىسكە جەتتى. فينالدا xGOD ۇجىمى رەسەيلىك LookingForOrg قۇرامىمەن كەزدەسىپ، 2:0 ەسەبىمەن جەڭىسكە جەتتى. ماتچ Inferno كارتاسىندا 13:9 جانە Overpass كارتاسىندا 13:11 جيىنتىق ۇپايمەن اياقتالدى. بۇل جەتىستىك xGOD ويىنشىلارىنىڭ جاقسى دايىندىعى مەن كاسىبيلىگىن كورسەتتى.

قازاقستاندىقتار 175 مىڭ دوللار جۇلدەنى جەڭىپ الدى.

سونىمەن قاتار، وتانداستارىمىز Dota2 بويىنشا ءار ءتۇرلى حالىقارالىق كوماندالار قۇرامىندا  ¼ فينالعا شىقتى.  قازاقستاننان بارعان فيدجيتال-حوككەيشىلەر (Cyber Barys) 1/8 فينالعا جولداما الدى. Young كومانداسىنىڭ جاتتىقتىرۋشىسى اليم راحمەتوۆ ءوز كومانداسىن ءبىرىنشى ورىنعا جەتەلەپ، ونىڭ كومانداسى 87،5 مىڭ دوللاردى جەڭىپ الدى. «تانكتەر الەمى» ديستسيپليناسىندا Rise كومانداسىنىڭ ويىنشىسى ستانيسلاۆ شتىرەنكو 1/4 فينالعا دەيىن جەتتى. ونىڭ كومانداسى تۋرنيرگە قاتىسقانى ءۇشىن 30 مىڭ دوللار الدى. Absolute كومانداسىنىڭ مۇشەسى ءادىل ەلدوسوۆ Standoff ديستسيپليناسىنىڭ جەڭىمپازى اتاندى. ونىڭ كومانداسى 87،5 مىڭ دوللار تاپتى.

ءبىزدىڭ Counter-Strike ويىنشىلارىمىز الەمدىك ارەنادا بۇرىننان بەرى جانكۇيەرلەردى قۋانتىپ كەلەدى.  وتانداستارىمىزدى جەڭىسىمەن قۇتتىقتايمىز!  مۇنداي جۇلدە قورى شىن مانىندە كيبەرسپورت الەمى ءۇشىن ەلەۋلى ناگرادا بولىپ سانالادى،  — دەدى قازاقستان كيبەرسپورت فەدەراتسياسىنىڭ پرەزيدەنتى قۋانىشبەك ەسەكەەۆ.

قازاقستاندا كيبەرسپورت ينفراقۇرىلىمى 2018 جىلدان باستاپ قارقىندى دامىپ كەلەدى. سودان كەيىن بۇل ديستسيپلينا العاش رەت رەسمي سپورت ءتۇرى بولىپ تانىلدى. ال جازدا كيبەرسپورت فەدەراتسياسى قۇرىلدى. سودان بەرى ەلدە جۇزدەگەن تۋرنيرلەر، سونىڭ ىشىندە بىرقاتار حالىقارالىق تۋرنيرلەر جالاۋىن كوتەردى.