مەملەكەت باسشىسى Aiqyn مەن «ليتەر» گازەتتەرىن 20 جىلدىق مەرەيتويىمەن قۇتتىقتادى 

مەملەكەت باسشىسى قاسىم-جومارت توقاەۆ Aiqyn مەن «ليتەر» گازەتتەرىن 20 جىلدىق مەرەيتويىمەن قۇتتىقتادى. بۇل تۋرالى قازاقستان رەسپۋبليكاسى پرەزيدەنتىنىڭ ءباسپاسوز حاتشىسى-پرەزيدەنتءتىڭ كەڭەسشىسى بەرىك ءۋالي حابارلادى.

وتاندىق اقپارات كەڭىستىگىندە ويىپ تۇرىپ ورىن العان، بۇگىندە قازاقستاندىق جۋرناليستيكانىڭ شەبەرلىك مەكتەپتەرىنە اينالعان، ەگىز قوزىداي Aiqyn مەن «ليتەر» گازەتتەرىنىڭ وقىرمانمەن قاۋىشقانىنا 20 جىل تولىپتى. قوس باسىلىم وسى ۋاقىت ارالىعىندا زامانانىڭ ۇنىنە، قوعامنىڭ ايناسىنا اينالدى. تاقىرىپتى تارقاتىپ جازار تالداۋلارىمەن، سالماقتى ساراپتامالارىمەن، سۇيەكتى سۇحباتتارىمەن تانىلدى. بۇگىندە Aiqyn مەن «ليتەر» — ەلىمىزدەگى كوشباسشى گازەتتەردىڭ ءبىرى ءھام بىرەگەيى، — دەلىنگەن قۇتتىقتاۋ حاتتا دەدى بەرىك ءۋالي.

ول مەملەكەت باسشىسىنىڭ گازەتتەردىڭ وركەندەي بەرۋىنە تىلەكتەس ەكەنىن ايتىپ، Aiqyn مەن «ليتەر» باسىلىمدارىنىڭ الداعى ۋاقىتتا دا ەل دامۋىنا ەلەۋلى ۇلەس قوسا بەرەتىنىنە سەنىم ءبىلدىردى.

بۇعان دەيىن پرەزيدەنت قاسىم-جومارت كەمەل ۇلى تالانتتى جۋرناليست، بەلگىلى مەديامەنەدجەر تالعات ەشەن ۇلى باسقاراتىن «ايقىن-ليتەر» جشس-نىڭ قۇرامىنا كىرەتىن Turkistan اپتالىعىن دا 20 جىلدىق مەرەيتويىمەن قۇتتىقتاعان بولاتىن.

facebook.com/بەرىك ءۋالي