اسىق سپورتى حالىقارالىق فەدەراتسياسىنىڭ پرەزيدەنتى سايلاندى

پارلامەنت ءماجىلىسىنىڭ دەپۋتاتى، Respublica پارتياسىنىڭ مۇشەسى ولجاس قۇسپەكوۆ كوشپەندىلەردىڭ اسىق سپورتى حالىقارالىق  فەدەراتسياسىنىڭ پرەزيدەنتى بولىپ سايلاندى.

كوشپەندىلەردىڭ اسىق سپورتى حالىقارالىق  فەدەراتسياسىنىڭ تۇساۋكەسەرى Respublica پارتياسىنىڭ كەڭسەسىندە بولدى. جاڭادان سايلانعان ۇيىم پرەزيدەنتى اسىق ويىنىنىڭ سپورتقا تەڭەستىرىلۋى، اسىق اتۋمەن قانشا كوماندا مەن سپورتشىنىڭ اينالىساتىنى، وسى سالادا سپورت شەبەرلەرىنىڭ بار-جوعى، حالىقارالىق فەدەراتسيا وسى ۇلتتىق سپورت ءتۇرىن قالاي دامىتۋدى جوسپارلاپ وتىرعانىن ايتىپ بەردى.

وسى جەردە ايتاتىن ءبار نارسە، بىلتىر استانا قالاسىنىڭ 25 جىلدىعىنا وراي Respublica پارتياسىنىڭ ۇيىتقى بولۋىمەن قالادا ءۇش اسىق ويناۋ الاڭى اشىلىپ، رەسپۋبليكالىق چەمپيوناتتار ۇيىمداستىرىلعان بولاتىن.

ولجاس قۇسپەكوۆتىڭ ايتۋىنشا، كوشپەندىلەردىڭ اسىق سپورتى حالىقارالىق فەدەراتسياسىنا مۇشە بولۋعا بىرقاتار مەملەكەتتەر تىلەك ءبىلدىرىپ وتىر.

بۇگىندە فەدەراتسياعا تۇركيا، رۋمىنيا، موڭعوليا، ساحا رەسپۋبليكاسى (رەسەي فەدەراتسياسى)، قىرعىزستان مەن يسپانيانىڭ وكىلدەرى مۇشە. بيىل ماجارستان، وزبەكستان مەن قىتاي حالىق رەسپۋبليكاسىنىڭ سپورت ۇيىمدارى دا فەدەراتسياعا قوسىلۋدى جوسپارلاپ وتىر، — دەدى پارلامەنت ءماجىلىسىنىڭ دەپۋتاتى ولجاس قۇسپەكوۆ.

ونىڭ پىكىرىنشە، فەدەراتسيا الدىندا كوشپەندىلەردىڭ اسىق سپورتى حالىقارالىق  فەدەراتسياسى دۇنيەجۇزىلىك ەنتوسپورت قاۋىمداستىعىنا مۇشە بولۋ، اسىق اتۋ سپورتىن حالىقارالىق دەڭگەيگە كوتەرۋ ءۇشىن دەمەۋشىلەردى تارتۋ، اسىق اتۋ سپورتىنىڭ تاريحىن تەرەڭدەتىپ زەردەلەۋ، اسىق اتۋدىڭ ادام اعزاسىنا تيگىزەتىن پايداسىن مەديتسينالىق زەرتتەۋ، اسىق سپورتىنىڭ جاڭا قاعيداتتارىن دايىنداپ، بەكىتۋ، اسىق اتۋ سپورت جابدىقتارىنىڭ ستاندارتتارىن بەكىتۋ، V دۇنيەجۇزىلىك كوشپەندىلەر ويىندارىنا دايىندىق (قاتىسۋشى ەلدەر سانىن كوبەيتۋ)، سونداي-اق ءبىرىنشى الەم چەمپيوناتىنا دايىندىق سياقتى اۋقىمدى جۇمىستار تۇر.

اسىق اتۋ سپورتىمەن قازىرگى ۋاقىتتا ونى 89 432 سپورتشى ۇنەمى اينالىسادى. قازاقستان رەسپۋبليكاسىنىڭ 60-تان استام سپورت شەبەرلەرى بار.

بيىلعى جىلى ستەپنوگورسك قالاسىندا ەل پرەزيدەنتى قاسىم-جومارت توقاەۆتىڭ سپورت جۇرتشىلىعىمەن كەزدەسۋىندە حالقىمىزدىڭ عاسىرلار بويى اسىق ويناعانىمىزدى جانە وسى سپورت ءتۇرىن حالىقارالىق دەڭگەيگە كوتەرىپ كەلە جاتقانىمىزدى اتاپ ءوتتى. بۇل قولداۋ ءبىزدىڭ سپورتشىلاردىڭ رۋحىن كوتەردى.

اسىق اتۋ ورتا مەكتەپ باعدارلاماسىنا ەنگىزىلدى، قازاقستان پرەزيدەنتىنىڭ جۇلدەلەرى بەكىتىلدى. ۇلتتىق سپورت ويىندارىنىڭ باعدارلامالارى «بولاشاق» باعدارلاماسى بويىنشا شەتەلدە وقيتىن جاستار اراسىندا وتكىزىلەدى. سونداي-اق قازاقتاردىڭ دۇنيەجۇزىلىك قۇرىلتايىندا جارىستار ۇيىمداستىرىلادى.

اياۋلىم السەيىتوۆا،

استانا