SportPress.kz قازاقستان سپورت جاڭالىقتارى
ۇزاق جىلداردان كەيىن كوركەم گيمناستيكادان استانا قالاسى FIG دارەجەسىندەگى ءتۋرنيردى قابىلدادى، دەپ حابارلادى استانا قالاسى دەنە شىنىقتىرۋ جانە سپورت باسقارماسى.
الەمدىك كۇنتىزبەگە ەنگەن حالىقارالىق تۋرنيردە وتاندىق سپورتشىلاردان بولەك، وڭتۇستىك كورەيا، قىرعىزستان، ازەربايجان، جانە بەيتاراپ ەلدىڭ كوركەم گيمناسشىلارى دا كەلدى.
حالىقارالىق كوركەم گيمناستيكا فەدەراتسياسىنىڭ جارىسىن قابىلداۋ تالاپتارى جوعارى. بىرىنشىدەن، سپورت كەشەنىنىڭ بيىكتىگى، جارىعى، 3 مىڭ ادام سياتىن ورىندىعى ت.ب بىرنەشە كورسەتكىشكە لايىق بولۋى شارت. ەكىنشىدەن، وسى دەڭگەيدەگى ءتۋرنيردى وتكىزگەندە كەمىندە 5 ەل قاتىسۋى ءتيىس. وكىنىشكە قاراي، سوڭعى ساتتە ەگيپەت ەلى كەلۋدەن باس تارتتى. ۇشىنشىدەن، تەك ءبىزدىڭ Alem اكادەمياسىندا ەلەكتروندى تابلو بار. بۇل دا جارىستىڭ ءىرى دەڭگەيىندە ۇيىمداستىرۋىلۋىنا اسەر ەتەدى، — دەدى الەم حالىقارالىق كوركەم گيمناستيكا اكادەمياسىنىڭ باسشىسى اسەم باقىتجانقىزى.
جارىستا بۇرا تارتۋشىلىق بولماۋ ءۇشىن، تورەشىلەردىڭ 50%-ى وتاندىق، 50%-ى يران، وزبەكستان، وڭتۇستىك كورەيا، ازەربايجان، بەيتاراپ ەلدى قۇراپ وتىر.
22-24 ناۋرىز كۇندەرى وتەتىن حالىقارالىق تۋرنيردە 150-دەن استام سپورتشىلار باق سىنايدى. ولار 2006-2008 جىلدارى دۇنيەگە كەلگەن جانە 2008 جىلدان كەيىنگى جاسوسپىرىمدەر بىرنەشە جاتتىعۋدا جۇلدەگە تالاسادى.
جارىستىڭ ءبىرىنشى كۇنى سپورتشىلار شىعىرشىق جانە دوپ سايىسىندا ىرىكتەۋ كەزەڭىندە ونەر كورسەتتى. ال جەڭىمپازدار 24 ناۋرىزدا انىقتالادى.
