رىباكينا مەن پۋتينتسەۆا شيرەك فينالعا شىقتى

قازاقستان تەننيسشىلەرى ەلەنا رىباكينا مەن يۋليا پۋتينتسەۆا اقش-تىڭ مايامي شتاتىندا ءوتىپ جاتقان WTA 1000 ءتۋرنيرىنىڭ شيرەك فينالىنا شىقتى، دەپ حابارلادى قازاقستان  تەننيس فەدەراتسياسى.

رىباكينا ءتورتىنشى اينالىمدا الەمنىڭ 18-راكەتكاسى، 2017 جىلعى اقش چەمپيوناتىنىڭ ءفيناليسى، امەريكالىق مەديسون كيزبەن وينادى.

كيز رىباكينا ءۇشىن قولايسىز قارسىلاس دەۋگە بولادى. ولار وسىعان دەيىن ءۇش رەت كەزدەسسە، سونىڭ ەكەۋىندە امەريكالىق سپورتشى جەڭىسكە جەتكەن ەدى.

بۇل جولى ءبىرىنشى پارتيادا ەسەپ 4:3 بولعان كەزدە رىباكينا برەيك جاساي الدى. سوسىن سەتكە دوپ بەرگەندە، ءوز مۇمكىندىگىن جىبەرگەن جوق. ءبىرىنشى پارتيا  6:3 ەسەبىمەن قازاقستان تەننيسشىسىنىڭ پايداسىنا شەشىلدى.

ەكىنشى سەتتە رىباكينا برەيكپەن العا شىقتى. دەگەنمەن كيز دە قالىسپادى. ول ەسەپتى تەڭەستىرىپ كەتتى.  ەسەپ 5:5 بولعان كەزدە وتانداسىمىز تاعى ءبىر برەيك جاساپ، سودان كەيىن ماتچتى 7:5 ەسەبىمەن اياقتادى.

ەندى رىباكينا جارتىلاي فينالعا شىعۋ ءۇشىن الەمنىڭ 9-راكەتكاسى، گرەكيالىق ماريا ساككاريمەن كەزدەسەدى.

يۋليا پۋتينتسەۆا 1/8 فينالدا الەمنىڭ 36-راكەتكاسى، ۋكراينالىق انگەلينا كالينينامەن سىنعا ءتۇستى.

ءبىرىنشى پارتيادا پۋتينتسەۆا 4:0 ەسەبىمەن العا شىقتى. سودان كەيىن ول قارسىلاسىنا ءبىر برەيك بەرىپ قويعانىمەن، ءوز دەگەنىنە جەتتى. ءبىرىنشى پارتياداعى ەسەپ 6:4 بولدى.

ەكىنشىسى سەتتە كالينينا 4:1 ەسەبىمەن العا شىقتى. دەگەنمەن پۋتينتسەۆا تارازى باسىن تەڭەستىرىپ، تاي-برەيكتە7:6 (7:5) ەسەبىمەن جەڭىسكە جەتتى.

يۋليا پۋتينتسەۆا جارتىلاي فينالعا شىعۋ ءۇشىن كەزىندە دۇنيەجۇزىلىك رەيتينگىدە كوش باستاعان، قازىر 32-ورىنداعى بەلارۋس وكىلى ۆيكتوريا ازارەنكومەننەمەسە الەمنىڭ 30-راكەتكاسى، ۇلىبريتانيالىق كەتي بۋلتەرمەن وينايدى.

پۋتينتسەۆانىڭ رەيتينگىدەگى ورنىنا كەلسەك، ول WTA Live تىزىمىندە 52-ورىنعا كوتەرىلدى.