وليمپيادا-2024: قازاقستان اۋىر اتلەتتەرى الەم كۋبوگىنا قاتىسىپ جاتىر

تايلاندتىڭ پحۋكەت قالاسىندا اۋىر اتلەتيكادان الەم كۋبوگى ءۇشىن ليتسەنزيالىق جارىس باستالدى. وعان قازاقستان قۇراماسى دا قاتىسىپ جاتىر.

كەشە پوموستقا ۇلتتىق قۇراما ساپىنان ەرناز الپىسوۆ (55 كگ) شىقتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسى.

ول جۇلقا كوتەرۋدە ءبىر مۇمكىندىگىن، ال سەرپە كوتەرۋدە ەكى مۇمكىندىگىن ءتيىمدى پايدالانا المادى. ەرناز الپىسوۆ 237 كگ ناتيجەمەن (جۇلقا – 107 كگ، سەرپە – 130 كگ) ا توبىندا التىنشى ساتىدان كورىندى.

بۇل سىندا سولتۇستىك كورەيا سپورتشىسى ۋن چول پانگ (118+152) الەم كۋبوگىنىڭ يەگەرى اتاندى. كۇمىس مەدالدى تايلاندتىڭ وكىلى ناتتاۆات چومچۋەن (119+150)، قولا جۇلدەنى ۆەتنامدىق تحانا لاي (120+148) يەلەندى.

بىلتىرعى الەم چەمپيوناتىندا ەرناز الپىسوۆ جالپى ەسەپتە 233 كەلىنى كوتەرگەن. وسى جارىستا سول كورسەتكىشتى جاقسارتا الدى. ونىڭ بۇدان دا جوعارى ورىننان كورىنۋگە شاماسى بار ەدى. الايدا سالماق قۋ ءوز اسەرىن تيگىزدى. كەلەسى وليمپيالىق اينالىمدا ول وليمپيادا باعدارلاماسىنا كىرەتىن 61 كگ دەيىنگى سالماقتا ونەر كورسەتەد، — دەدى ەرلەر ۇلتتىق قۇرامانىڭ باس جاتتىقتىرۋشىسى داۋرەن بەكمۇحانبەتوۆ.

سونىمەن قاتار ايەلدەر اراسىندا 49 كگ دەيىنگى سالماقتاعى بارلىق جارىس اياقتالدى. ۇلتتىق قۇراما سپورتشىسى اينۇر ابدىحالىقوۆا ءبىر كۇن بۇرىن سىنعا ءتۇستى.

ايەلدەر قۇراماسىنىڭ جاتتىقتىرۋشىسى يۆان سنەگۋروۆتىڭ ايتۋىنشا، سپورتشىعا وليمپيادانىڭ جولداماسىن الۋعا ءالى مۇمكىندىك بار.

اينۇر جاقسى ونەر كورسەتتى. بارلىق التى مۇمكىندىگىن ءساتتى پايدالانىپ، ازىرگە كارەراسىنداعى ۇزدىك ناتيجەنى كورسەتتى (قوس سايىستا 160 كگ). جالپى ەسەپتە 12-13-ساتىدا كەلە جاتىر. ياعني، وليمپيادا ليتسەنزياسىنا يە بولاتىن مۇمكىندىگى بار. ءبارى ۇپايلار ەسەپتەلىپ، سوڭعى رەيتينگ شىققاندا بەلگىلى بولادى، — دەدى يۆان سنەگۋروۆ.

بۇگىن، 2 ساۋىردە الەم كۋبوگىندا داريا بالابايۋك (59 كگ) جۇلدەگە تالاسادى.