ەلىمىزدە تۇڭعىش رەت سۋردو دزيۋدودان الەم چەمپيوناتى وتەدى

12-14 ءساۋىر ارالىعىندا ەلىمىزدە تۇڭعىش رەت سۋردودزيۋدودان الەم چەمپيوناتى وتەدى. الەمدىك دودا تۇركىستان قالاسىندا قازاقستان سۋردودزيۋدو فەدەراتسياسى مەن سۋردليمپيادا كوميتەتىنىڭ ۇيىمداستىرۋىمەن جالاۋىن كوتەرەدى.

سۋردو دزيۋدو فەدەراتسياسىنىڭ حابارلاۋىنشا، وعان 25 ەلدەن 200 سپورتشى قاتىسادى دەپ جوسپارلانىپ وتىر.

ەلىمىزدە العاش رەت جالپى سۋردليمپيادالىق سپورت تۇرلەرى بويىنشا الەم چەمپيوناتى وتكىزىلەيىن دەپ وتىر. بۇل — تاريحي وقيعا.  ول ءبىز ءۇشىن ۇلكەن جاۋاپكەرلىشىك. ەستۋ قابىلەتى زاقىمدانعان سپورتشىلاردى قولداۋدىڭ ەڭ ءبىر جاقسى بەلگىسى وسى بولار. قازىر ەلىمىزدە دزيۋدو سپورتى جاقسى دامىپ كەلەدى. سونىڭ ىشىندە سۋردو دزيۋدومەن اينالىساتىندار سانى دا از ەمەس.

بۇگىن سۋردو دزيۋدودان ۇلتتىق قۇرامامىزدا ەل نامىسىن قورعاپ جۇرگەن سپورتشىلار دا ءوزىنىڭ سپورتتىق جولىن بالا كەزىندە قاراپايىم دزيۋدودان باستاعان. سپورتشىلارىمىزدىڭ ەشتەڭەگە قاراماستان، مويىماي، ماقساتقا جەتۋ جولىنداعى جانكەشتىلىگى ءبىزدى ءاردايىم جىگەرلەندىرەدى، ءتانتى ەتەدى، — دەدى قازاقستان سۋردو دزيۋدو فەدەراتسياسىنىڭ پرەزيدەنتى قۋانىشبەك مۇقاش.

ونىڭ ايتۋىنشا، تۇركىستان تاتاميىندە سۋردليمپيادا چەمپيوندارى، الەم چەمپيوندارى باس قوسادى. مۇنداي ءىرى الەمدىك جارىس ەلىمىزدەگى سۋردليمپيادالىق سپورت تۇرلەرىنىڭ دامۋ قارقىنىن جاڭا ساتىعا كوتەرەدى.

ايتا كەتەرلىگى، سۋردودزيۋدودان الەم چەمپيوناتى تۇركىستان قالاسىنداعى Olympic centre سپورت كەشەنىندە وتەدى.