Kásipker Raqymǵalı Qul-Muhammed memleketke qolǵabys jasady

Belgili kásipker, «Atamura» korporaııasynyń prezıdenti Raqymǵalı Qul-Muhammed elimizde sý tasqyny men qardyń sýynan zardap shekken óńirlerdiń halqyna óz atynan qarjylaı kómek berdi.

Qurmetti dostar!

Elimizdiń biraz óńirin sý basyp, halqymyzdyń basyna aýyrtpalyq túsip, qatty qıyndyq kórip jatqany meni de alańdatyp otyr.

Osy bir qıyn kúnderde ózderińizben birge ekenimdi bildirip, tabıǵat apatynan zardap shekken baýyrlarymyzǵa demeýshilik jasap, óz atymnan 10 mln teńge aýdaryp, kómek kórsetýdi jón sanadym.

Halqymyzǵa Alla sabyr men tózim, birlik pen bereke bersin! Qıyndyqtan tezirek shyǵýlaryńyzǵa tilektespin!

Elimiz aman, jurtymyz tynysh bolsyn!, – dedi kásipker.

Bul kómekti ol óz atynan berdi. Onyń baspaǵa esh qatysy joq.

Men sheneýnik emespin, kásipkermin. Elge janashyrlyq kórsetip, basqa da ózim sııaqty kásirpkerlerge úlgi bolsyn dep kómek berdim.

Qazir elimizdiń birneshe óńirin sý alyp ketti. Baspanasyz qalǵan, maly qyrylyp, múlki joǵalǵan halyq kóp. Sondyqtan osyndaı el basyna kún týǵan sátte kómek qolyn sozatyn azamattardyń kóp bolǵany jón dep sanaımyn!, –  dedi ol.

Qazir sý tasqyny men qardyń sýynan zardap shekken óńirlerdiń halqyna óz atynan qarjylaı kómek berip jatqan mekemeler men jekelegen azamattar kóbeıip jatyr. Ataqty ánshi Dımash Qudaıbergen men onyń ákesi Qanat Aıtbaı da Aqtóbedegi sý tasqynynan zardap shekkenderge kómek kórsetip jatqan eriktiler shtabyna bardy.

«Qazaqstan halqyna» qory sý tasqynynan zardap shekkenderge kómek mólsherin 10 mlrd teńgege deıin kóbeıtetinin jarııalasa, «Samuryq-Qazyna» ál-aýqat qorynyń kompanııalar toby sý tasqyny saldaryn joıýǵa 15 mlrd teńge bóletin boldy. Budan basqa da kompanııalar, bankter men kóptegen mekemeler zardap shekken otbasylar men azamattarǵa mıllıardtap, mıllıondap kómek qolyn sozyp jatyr.

Dastan KENJALIN,

ASTANA