Dzıýdodan ACh: Qazaqstan elge tórt qola medalmen kele jatyr

Búgin Qytaıdyń Gonkong qalasynda dzıýdodan XXXII Azııa chempıonaty aıaqtaldy.

Chempıonattyń sońǵy kúni ulttyq qurama aralas komandalyq saıysta qola medaldi jeńip aldy. Júlde jolynda Túrkmenstanmen bolǵan jekpe-jek 4:2 esebimen Qazaqstannyń paıdasyna sheshildi.

Tatamıge alǵash shyqqan Ekaterına Tokareva, odan keıin asa aýyr salmaqtaǵy Kamıla Berliqash pen Erasyl Qajybaev qarsylasynyń jaýyrynyn jerge tıgizdi. Osy eki ortada Asqar Arapov pen Baqyt Qusaqbaevadan túrkmenstandyq dzıýdoshy aılasyn asyryp ketti. Sheshýshi beldesýde 2022 jylǵy Azııa chempıony Danııar Shamshaev komandamyzǵa jeńis syılady.

Aralas komandalyq saıysta Japonııa fınalda Mońǵolııadan basym tússe, ekinshi qola júlde О́zbekstanǵa buıyrdy. Túrkmenstan men Ońtústik Koreıa júldege bir taban jetpeı qaldy.

Osyǵan deıin jekeleı synda Ǵalııa Tynbaeva (-48 kg), Janarys Rahmetqalı (-66 kg), Esmıgýl Kýıýlova (-63 kg) óz salmaǵynda úshinshi orynnan kórindi.

Búgingi saıysqa komanda medal alamyz dep shyqty. Bárimiz barymyzdy saldyq. Qazir reıtıngte upaı jınaý mańyzdy. Chempıonatty osylaı jaqsy kóńil-kúıde aıaqtap jatqanymyzǵa qýanyshtymyn, — dedi Kamıla Berliqash Sportty damytý dırekııasynyń baspasóz qyzmetine bergen suhbatynda.

Azııa chempıony Olımpıada reıtınginde 700, kúmis júldeger 490 upaı alsa, qola medal alǵan eki dzıýdoshyǵa 350 ball qosyldy. Qola júlde úshin kúreste jeńilgen taǵy eki sportshy 250 upaı ıelenedi.

Jekeleı syndaǵy nátıje ózim oılaǵandaı bolmady. Jerebe sátsiz boldy dep aqtalǵym kelmeıdi. Munda kelgen soń qarsylas tańdap jatpaımyz. Búgin komandanyń medal alýyna kómekteskenim úshin qýanyp turmyn. Endi aldaǵy iri jarystarda barymdy kórsetkim keledi,-dedi Danııar Shamshaev.

Bıyl barlyǵy sary qurlyq dodasyna 34 eldiń 262 tańdaýly tatamı sheberi jınaldy.

Shamken BAIYRBEK,

ASTANA