رىباكينا كەزەكتى ءتۋرنيرىن جەڭىسپەن باستادى (ۆيدەو)

الەمنىڭ ءتورتىنشى جانە قازاقستاننىڭ ءبىرىنشى راكەتكاسى ەلەنا رىباكينا يسپانيانىڭ مادريد قالاسىندا باستالعان WTA 1000 ءتۋرنيرىنىڭ ءۇشىنشى كەزەڭىنە شىقتى.

ەكىنشى كەزەڭدە رىباكينا يتاليانىڭ وكىلى ليۋچيا برونتسەتتيدى ەكى سەتتە 6:4، 6:3 ەسەبىمەن جەڭدى. برونزەتتي ءبىرىنشى اينالىمدا فرانتسيانىڭ تەننيسشىسى ۆارۆارا گراچەۆادان 6:3، 6:3 ەسەبىمەن باسىم تۇسكەن ەدى.

ەندى وتانداسىمىز 1/16 فينالدا ۋكراينانىڭ سپورتشىسى لەنا-مارتا كوستيۋك مەن مىسىرلىق مايار شەريف احمەد شەريفتىڭ اراسىنداعى ويىنىنىڭ جەڭىمپازىمەن سىنعا تۇسەدى.

ەلىمىزدىڭ تاعى ءبىر تەننيسشىسى اننا دانيلينا پورتۋگاليانىڭ وەيراش قالاسىندا ءوتىپ جاتقان ITF W100 ءتۋرنيرىنىڭ جارتىلاي فينالىنا شىقتى.

جارىستىڭ ءۇشىنشى راكەتكالارى بولىپ تىركەلگەن دانيلينا مەن نيدەرلاندتىق بيبيانا سحووفس العاشقى اينالىمدا رۋمىنيالىق يرينا بارە مەن كريستينا-اندرەا ءميتۋدى 6:2، 6:2 ەسەبىمەن جەڭدى. سودان كەيىن اننا دانيلينا مەن بيبيانا سحووفس شيرەك فينالدا پورتۋگاليالىق انا-فيليپا سانتوس مەن يسپانيالىق ليۋسيا كورتەز يوركتەن 6:3، 6:1 ەسەبىمەن باسىم ءتۇستى.

بۇل ماتچ ءبىر ساعاتتان استام ۋاقىتقا سوزىلدى.

اننا دانيلينا مەن بيبيانا سحووفستىڭ جارتىلاي فينالداعى قارسىلاستارى كەيىن بەلگىلى بولادى.
سونىمەن بىرگە قىتايدىڭ شەنچجەن قالاسىندا جالاۋى جەلبىرەگەن چەللەندجەر تۋرنيرىندە دەنيس ەۆسەەۆ شيرەك فينالعا شىقتى.

ول ەكىنشى اينالىمدا الەمنىڭ 262-راكەتكاسى، اۋستراليالىق فيليپ سەكۋليچپەن وينادى.

ماتچ تارتىستى بولدى. ءبىرىنشى پارتيادا ەۆسەەۆ تاي-برەيكتە ءساتتى ويناپ، 7:6 (7:3) ەسەبىمەن، ەكىنشى سەت 6:3 ەسەبىمەن جەڭدى.

ەندى ەۆسەەۆ جارتىلاي فينالعا شىعۋ ءۇشىن الەمنىڭ 223-راكەتكاسى، ەستونيالىق مارك لايال نەمەسە رەيتينگىدە 253-ساتىداعى ۇلىبريتانيالىق ارتۋر فەريمەن كەزدەسەدى.

دميتري پوپكو اقش-تىڭ ساۆاننا چەللەندجەر ءتۋرنيرىنىڭ شيرەك فينالىنا جولداما الدى.

قازاقستاندىق تەننيسشى ەكىنشى اينالىمدا دۇنيەجۇزىلىك رەيتينگىدە 248-ورىندا تۇرعان امەريكالىق ەتان كۋيننىڭ مىسىن باستى.

ءبىرىنشى پارتيادا پوپكو 6:4 ەسەبىمەن باسىم تۇسسە، ەكىنشىسىندە كۋينن قارىمتا قايتاردى. ەسەپ  – 7:5. شەشۋشى، ءۇشىنشى سەتتە پوپكو 6:3 ەسەبىمەن جەڭدى.

دميتري پوپكو جارتىلاي فينالعا شىعۋ ءۇشىن رەيتينگىدە 252-ساتىداعى نيدەرلاندتىق گيس برۋۆەرمەن كۇش سىناسادى.

تيموفەي سكاتوۆ چەحيانىڭ وستراۆا قالاسىندا باستالعان «چەللەندجەر» سەرياسىنىڭ ءتۋرنيرىنىڭ ¼ فينالىندا جەرگىلىكتى تەننيسشى زدەنەك كولاردىڭ الاڭعا شىقپاۋىنا بايلانىستى جارتىلاي فينالعا جولداما الدى. ول ½ فينالدا گەرمانيالىق گەنري سكۆايەرمەن وينايدى.

داستان كەنجالين،

استانا