SportPress.kz قازاقستان سپورت جاڭالىقتارى
دزيۋدوشى ماعجان شامشادين تاجىكستاننىڭ استاناسى — دۋشانبەدە باستالعان ۇلكەن دۋلىعا (Grand Slam) ساناتىنداعى ءتۋرنيردىڭ كۇمىس جۇلدەگەرى اتاندى.
ۇلتتىڭ قۇرامانىڭ بەلدى وكىلى 60 كەلىگە دەيىنگى سالماقتا فينالدا جارىس قوجايىنى مۇحاممەدسولەح كۋباتوۆقا جەڭىلىپ، كۇمىس جۇلدەنى قاناعات تۇتتى. قولا مەدالدى يزناۋر سااەۆ پەن حاياتو كوندو يەلەندى.
بۇل — ماعجان ءشامشاديننىڭ ۇلكەن دۋلىعا ساناتىنداعى جارىستاردا العان ءتورتىنشى جۇلدەسى. ول بىلتىر استانادا العاش رەت وتكەن Qazaqstan Barysy Grand Slam-دا جەڭىمپاز اتانعان. ال 2022 جىلى تەل-اۆيۆتە پەن 2023 جىلى تبيليسيدە قولا جۇلدەگە يە بولعان.
ماعجان شامشادين بۇگىن ىرىكتەۋدە مۇحامماد ماحماديزودانى (تاجىكستان)، اندجەلو پانتانونى (يتاليا) جەڭىپ، س توبىنان شىقتى. ال جارتىلاي فينالدا يزناۋر سااەۆتىڭ (رەسەي) وسال تۇسىن تاپتى.
وسى سالماقتاعى تاعى ءبىر سپورتشىمىز نۇرقانات سەرىكباەۆ العاشقى بەلدەسۋىندە جاپون پالۋانى حاياتو كوندوعا جول بەردى.
IJF ەرەجەcىنە سايكەس، Grand Slam جەڭىمپازى مەن جۇلدەگەرلەرى الەم جانە وليمپيادا رەيتينگىندە ۇپايعا يە بولادى. اتاپ ايتار بولساق، ءبىرىنشى ورىن ءۇشىن 1 000، ەكىنشى ورىن ءۇشىن 700، ال ءۇشىنشى ورىن العان ەكى دزيۋدوشى 500 بالل الادى.
شامكەن بايىربەك،
استانا
