كوماندا وليمپياداعا جاقسى دايىندالىپ جاتىر – مىرزاعالي ايتجانوۆ (ۆيدەو)

بوكستان قازاقستان قۇراماسى 13-18 مامىر ارالىعىندا استانادا وتەتىن «ەلوردا كۋبوگى» ءتۋرنيرى قارساڭىندا باق وكىلدەرىنە ارناپ اشىق جاتتىعۋ جيىنىن وتكىزدى.

جيىنعا ۇلتتىق قۇرامانىڭ ءبىرىنشى ءنومىرلى سپورتشىلارىنىڭ ءبارى قاتىسىپ جاتىر. ۇلتتىق قۇراما كوماندانىڭ باس جاتتىقتىرۋشىسى مىرزاعالي ايتجانوۆ باق وكىلدەرىنە وليمپياداعا دايىندىقتىڭ قالاي ءوتىپ جاتقانىن ايتتى.

ونىڭ ايتۋىنشا، كوماندانىڭ «ەلوردا كۋبوگى» ءتۋرنيرى مەن وليمپياداعا دايىندىعى جاقسى.

«ەلوردا كۋبوگى» — ەلىمىزدە وتەتىن ەڭ ءىرى حالىقارالىق تۋرنيرلەردىڭ ءبىرى. بۇل سىنعا جىل سايىن جەر ءجۇزىنىڭ مىقتى دەگەن بوكسشىلارى جينالادى. بىراق بيىل بوسكشىلار وليمپياداعا قاتىساتىن بولعان سوڭ، ءار ەلدىڭ قۇراما كومانداسى وليمپياداعا ىرىكتەۋ تۋرنيرلەرىنە ءوز ەلدەرىندە دايىندالىپ جاتىر. سوندىقتان ءبىراز ەلدىڭ بوكسشىلارى كەلە المايدى. تۋرنيرگە جالپى ەسەبى 8 مەملەكەتتىڭ بىلعارى قولعاپ شەبەرلەرى كەلەدى دەپ جوسپارلانىپ وتىر. وسىنىڭ ءوزى ءبىزدىڭ پاريجگە باراتىن بوكسشىلار ءۇشىن ۇلكەن پايدا. ارقايسىسى 3-4 رەت شارشى الاڭعا شىعىپ، وليمپياداعا دايىندىعىن ءبىر سارالاپ الادى، — دەدى ول.

باس جاتتىقتىرۋشى بۇعان دەيىن تۇركىستان وبلىسىنداعى «الما تاۋ» بازاسىندا شەت ەل بوكسشىلارىمەن بىرگە جاتتىققانىن ايتتى.

بۇل جيىنعا وزبەكستان قۇراماسىنان وليمپياداعا قاتىساتىن ءتورت جىگىت قاتىستى. تاجىكستاننىڭ ءبىر وكىلى، كۋبا قۇراماسى كەلدى. جاتتىعۋ جيىنى كىشىگىرىم الەم چەمپيوناتى وتكەندەي اسەر قالدىردى. ويتكەنى، وندا  وليمپيادادا باق سىنايتىن سپورتشىلا جينالىپ، دايىندالدى.

جاتتىعۋ جيىنى بارىنە دە پايدالى بولدى. ءبىزدىڭ ماقسات — وليمپيادا. بوكسشىلار وليمپيادادا جاقسى ونەر كورسەتۋ ءۇشىن بارىن سالىپ، دايىندالىپ جاتىر، — دەدى مامان.

مىرزاعالي ايتجانوۆتىڭ ايتۋىنشا، «ەلوردا كۋبوگى» تۋرنيرىنە ۇلتتىق قۇرامانىڭ ءبىرىنشى، ەكىنشى جانە ءۇشىنشى ءنومىرلى سپورتشىلارى قاتىسادى. ولاردىڭ اراسىندا وليمپياداعا ليتسەنزيا العان ساكەن بيبوسىنوۆ (51 كگ)، ماحمۇد سابىرحان (57 كگ)، اسلانبەك شىمبەرگەنوۆ (71 كگ)، نۇربەك ورالباي (81 كگ)، ايبەك ورالباي (92 كگ) پەن قامشىبەك قوڭقاباەۆ (+92 كگ) بار.

تۋرنيردە قازاقستان قۇراماسى كەم-كەتىكتى تاعى ءبىر رەت انىقتاپ الادى. ازەربايجان مەن جاپونيادان وليمپياداعا قاتىساتىن بوكسشىلار كەلەدى. بىراق وزبەكستان كومانداسى وليمپيالىق قۇرامىن جىبەرگەن جوق. ول ەلدەن دە مىقتى بوكسشىلار قاتىسادى. وزبەكستان قۇراماسى رەسەيدە وتەتىن حالىقارالىق تۋرنيرگە بارادى.

«ەلوردا كۋبوگى» حالىقارالىق تۋرنيرىنە قازاقستان ساپىنان 60-قا جۋىق بوكسشى قاتىسادى.

 

View this post on Instagram

 

A post shared by Kazakhstan Olympic Team (@olympickz)