تەننيستەن جاسوسپىرىمدەر قۇراماسى الەم چەمپيوناتىنا جولداما الدى

تەننيستەن قازاقستان جاسوسپىرىمدەر قۇراماسى شىمكەنت قالاسىندا 16 جاسقا دەيىنگىلەر اراسىندا ءوتىپ جاتقان دەۆيس كۋبوگى ازيا – تىنىق مۇحيت ايماعى بويىنشا ىرىكتەۋ تۋرنيرىندە جەڭىسكە جەتتى، دەپ حابارلادى قازاقستان تەننيس فەدەراتسياسى.

شيرەك فينالدا سەرگەي كۆاك جاساقتاعان كوماندا الەمدەگى ۇزدىك قۇرامالاردىڭ ءبىرى، جاسوسپىرىمدەر اراسىندا دەۆيس كۋبوگىنىڭ التى دۇركىن چەمپيونى اۋستراليا قۇراماسىن 2:0 ەسەبىمەن جەڭدى.

ماتچتا اۋەلى ەل قۇراماسىنا دامير جالعاسباي كەمەرون بەرتوندى 6:3، 6:0 ەسەبىمەن جەڭىپ، ۇپايدى سىيلادى. سودان كەيىن زاڭعار نۇرلان ۇلى «ۇلكەن دۋلىعا» ءتۋرنيرىنىڭ ەكى دۇركىن جەڭىمپازى للەيتون حيۋيتتىڭ ۇلى – كرۋز حيۋيتەن 6:1، 6:0 ەسەبىمەن باسىم ءتۇستى.

بىلتىر دا شيرەك فينالدا قازاقستان قۇراماسى اۋستراليانى 2:0 ەسەبىمەن جەڭگەن ەدى. وسىلايشا، قازاقستان جاسوسپىرىمدەر كومانداسى الداعى كۇزدە 16 جاسقا دەيىنگىلەر اراسىندا دەۆيس كۋبوگىنىڭ فينالدىق كەزەڭىندە ەكىنشى جىل قاتارىنان باق سىنايدى.

ەرتەڭ ءجاسوسپىرىم تەننيسشىلەر جارتىلاي فينالدا كورەيا نەمەسە گونكونگ قۇراماسىمەن كەزدەسەدى.