ەلەنا رىباكينا: «وليمپيادادا بار كۇشىمدى جەكەلەي سىندا جەڭۋگە جۇمسايمىن»

الەمنىڭ ءتورتىنشى، ەلىمىزدىڭ ءبىرىنشى راكەتكاسى ەلەنا رىباكينا تەننيستەن پاريج قالاسىندا ءوتىپ جاتقان فرانتسيانىڭ اشىق چەمپيوناتى كەزىندە باق وكىلدەرىنىڭ سۇراقتارىنا جاۋاپ بەرىپ، الداعى جوسپارى تۋرالى ايتتى، دەپ حابارلادى قازاقستان تەننيس فەدەراتسياسى.

بۇعان دەيىن حابارلانعانداي، رىباكينا ۋكراينالىق ەلينا سۆيتولينانى 6:4، 6:4 ەسەبىمەن جەڭىپ، ودان توكيو وليمپياداسى كەزىندە كەتكەن ەسەنى قايتارىپ، «رولان گارروس» ءتۋرنيرىنىڭ شيرەك فينالىنا شىققان بولاتىن. ەندى ول ¼ فينالدا يتاليانىڭ وكىلى ياسمينە پاولينيمەن كۇش سىناسادى.

تەننيسشى باق وكىلدەرىمەن كەزدەسۋدە  يتاليالىق قارسىلاسىنىڭ وڭاي شاعىلاتىن جاڭعاق ەمەستىگىن اشىق ايتتى. بىراق، ونى دا جەڭۋگە تىرىساتىنىن جاسىرمادى.

ءبىز سوڭعى رەت شتۋتگارتتا وينادىق. ماتچ ءۇش سەتكە سوزىلدى. مەن ەسەپ بويىنشا العا شىققانىممەن، ول جاقسى قيمىلداپ، دوپتى قاتتى سوعىپ، قايتارىپ وتىردى. اياقتى شيراق قيمىلداتۋعا تۋرا كەلدى.

ءبىز ءبىر-ءبىرىمىزدى جاقسى بىلەمىز. ول تەننيستى جاقسى وينايدى. ماعان ەلينامەن ماتچ وتە قيىن بولدى. ەندى ءبارىن ۋاقىت كورسەتەدى، – دەدى رىباكينا ءباسپاسوز ءماسليحاتىندا.

ودان كەيىن ول وليمپيادادا جەكەلەي سىندا بار كۇش-جىگەرىن جۇمساپ، جەڭىسكە جەتۋگە تىرىساتىنىن ايتتى. .

ارينە، وليمپيادانىڭ چەمپيونى بولۋ بارلىق سپورتشىنىڭ ارمانى، ومىردەگى باستى ماقساتى. ازىرشە مەن وسى «رولان گارروس» تۋرالى عانا ويلاپ ءجۇرمىن. ماعان وسى جارىستا بارلىق قىرىنان كورىنىپ، جانكۇيەردىڭ سەنىمىن جەڭىپ الۋ ماڭىزدى بولىپ تۇر.

قازىر مەن كەلەسى ماتچقا دايىندالىپ ءجۇرمىن. ياسمينە ءپاولينيدى ءتورتىنشى اينالىمدا جەڭسەم، ءارى قاراي ءبارى بەلگىلى بولادى. وتە جاقسى ويناپ ءجۇرمىن دەپ ايتا الامىن. ۇيقى مەن دەنساۋلىعىما بايلانىستى الاڭداۋشىلىق بولدى. سوڭعى اپتادا سالماعىمدى ازداپ ءتۇسىردىم.  دەگەنمەن ءوزىمدى تاماشا سەزىنەمىن. ويىنداردى ەكى سەتپەن ءبىتىرىپ كەلە جاتقانىما قۋانىشتىمىن!، – دەدى ول.

تاعى دا ەسكە سالا كەتسەك، رىباكينا فرانتسيانىڭ بيىلعى اشىق چەمپيوناتىندا ءالى بىردە-ءبىر سەتتە جەڭىلگەن جوق.