ءامىر ومارحانوۆ «رولان گارروس» ءتۋرنيرىنىڭ شيرەك فينالىندا وينايدى

تەننيسشى ءامىر ومارحانوۆ فرانتسيانىڭ پاريج قالاسىندا جاسوسپىرىمدەر اراسىندا جۇپتىق سىندا ءوتىپ جاتقان «رولان گارروس» ءتۋرنيرىنىڭ شيرەك فينالىنا شىقتى، دەپ حابارلادى قازاقستان تەننيس فەدەراتسياسى.

جاس تەننيسشى رەسەيلىك تيموفەي دەرەپاسكومەن بىرگە ەكىنشى اينالىمدا جارىستىڭ 5-راكەتكالارى، فرانتسيالىق چارلي كاميۋ مەن اۋستراليالىق حايدەن دجونسپەن سىنعا ءتۇستى.

بۇل ويىندا ءبىرىنشى پارتيا تاي-برەيككە دەيىن سوزىلىپ، ومارحانوۆ پەن دەرەپاسكو شەشۋشى ساتتە 7:6 (7:4) ەسەبىمەن جەڭىسكە جەتتى.

ەكىنشى سەتتە ومارحانوۆ پەن دەرەپاسكو ءۇش برەيك جاساپ، ماتچتى جەڭىسپەن 6:2 ەسەبىمەن اياقتادى.

ەندى ولاردىڭ شيرەك فينالداعى قارسىلاستارى كەيىن انىقتالادى.