كونستانتين مالينوۆسكي ەل رەكوردىن قايتالاپ، الەم كۋبوگىنىڭ فينالىنا شىقتى

بۇگىن مەرگەن كونستانتين مالينوۆسكي گەرمانيانىڭ ميۋنحەن قالاسىندا نىسانا كوزدەۋدەن ءوتىپ جاتقان الەم كۋبوگىنىڭ شەشۋشى كەزەڭىندە فينالعا شىقتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسى.

ول 50 مەترگە 3 پوزيتسيادا ۆينتوۆكامەن نىسانا كوزدەۋدىڭ ىرىكتەۋدە 593 ۇپاي جيناپ، بەسىنشى ورىن الدى.

ەرتەڭ كونستانتين مالينوۆسكي فينالدا جۇلدەگە تالاساتىن 8 ادامنىڭ اراسىندا بولادى. ول كەشە العاشقى ىرىكتەۋ اينالىمىندا 585 بالعا يە بولىپ، 140 سپورتشىنىڭ اراسىنان تاڭداۋلى 70 اتلەتتىڭ قاتارىنا قوسىلعان.

كەشە العاشقى ىرىكتەۋگە قاتىسقان 140 سپورتشىنىڭ اراسىنان نەگىزگى كەزەڭگە شىقتىم. بۇگىن ءبارى ءوزىم ويلاعانداي بولدى. ءبىر اي بۇرىن ريوداعى كەزەڭدە 593 ۇپاي جيناپ، قازاقستان رەكوردىن جاساعانمىن. مانا سول كورسەتكىشىمدى قايتالادىم. ەرتەڭگى فينالعا دايىنمىن،-دەدى ول ىرىكتەۋدەن كەيىن سپورتتى دامىتۋ ديرەكتسياسىنا بەرگەن سۇحباتىندا.

كونستانتين مالينوۆسكي ءبىر اي بۇرىن ريو-دە-جانەيرودا وتكەن الەم كۋبوگىندا فينالعا جەتىپ، بەسىنشى ورىن العان (50 م). سونداي-اق ول بىلتىر جاكارتاداعى كەزەڭدە كۇمىس جۇلدەنى يەلەنگەن(10 م). بۇدان باسقا بىلتىر وڭتۇستىك كورەيادا وسى جاتتىعۋدا (50 مەتر) ازيا چەمپيونى اتانعان.