SportPress.kz Qazaqstan sport jańalyqtary
Almatyda «Dúısenbilik sport» jobasy aıasynda NEET sanatyndaǵy jastar arasynda voleıboldan chempıonat boldy.
Buǵan deıin «Dúısenbilik sport» jobasy aıasynda Almaty qalasy bazar jastarynyń arasynda shaǵyn fýtboldan týrnır ótken bolatyn.
Bıylǵy dodaǵa «Qyrǵaýyldy», «Baqorda», «Arǵymaq», «Arǵymaq1», «AltynOrda», «Baqorda» t.b saýda ortalyqtarynda jumys isteıtin jastar men NEET sanatyndaǵy VKM, «Belgibaı», «Otaý-Qurmet» ıaǵnı, jumyssyz jastardan quralǵan 16 komanda qatysty.
Jyl saıyn dástúrge aınalǵan «Dúısenbilik sport» jobasyna tapsyrys berýshisi – Almaty qalasy Jastar saıasaty basqarmasy. Ony uıymdastyrý bıyl baıqaý qujattaryna sáıkes Social project management» ortalyǵy qoǵamdyq qoryna júkteldi.
Chempıonat eki sport zalda qatar boldy.
Alǵashqy irikteý kezinde 16 komanda eki topqa bólinip, ózara irikteý oıyndaryn ótkizdi. Komandalar keremet oıyn órnegin kórsetýge tyrysyp-aq baqty. Shırek fınal men jartylaı fınaldyq saıysqa súrinbeı jetken komandalar arasyndaǵy oıyn tartysty ótti.
Fınalda «Belgibaı» men «Arǵymaq» komandalary altyn medal men kýbok úshin jan alysyp, jan beristi. Fınaldyq básekedegi eki komandanyń shabýylshylary bar aıla-tásilin qoldanyp-aq baqty. Degenmen 2:0 esebimen «Belgibaı» komandasynyń jigitter basym túsip, altyn júldeni jeńip aldy.
Chempıonat qortyndysy boıynsha birinshi oryn alǵan «Belgibaı» komandasyna 250 myń teńgeniń, ekinshi oryn alǵan «Arǵymaq» komandasyna 150 myń teńgeniń, úshinshi oryn alǵan eki komanda «Otaý-Qurmet» pen VKM komandalaryna 50 myń teńgeniń sertıfıkattary tabys etildi.
Endi aldaǵy ýaqytta «Dúısenbilik sport» jobasy aıasynda NEET sanatyndaǵy jastar arasynda basketboldan keminde 16 komanda qatysatyn jarys uıymdastyrý josparda bar. Sonymen birge ústel tennısi men kıbersport boıynsha chempıonattyń da jalaýy kóteriledi.
Rústem JUMAN,
ALMATY
