فۋتبولدان ءاچ: وزبەكستان مەن قىرعىزستان ىرىكتەۋ تۋرنيرىنە شىقتى

وزبەكستان مەن قىرعىزستان ەلدەرىنىڭ ۇلتتىق قۇراما كوماندالارى فۋتبولدان 2026 جىلى وتەتىن الەم چەمپيوناتىنىڭ ازيا قۇرلىعى بويىنشا ىرىكتەۋ تۋرنيرىنە شىقتى. ولاردان باسقا تاعى 16 ەلدىڭ قۇرامالارى ىرىكتەۋ تۋرنيرىنە جولداما الدى، دەپ حابارلادى uza.uz.

كەشە ازيا قۇرلىعىندا 2026 جىلعى الەم چەمپيوناتىنىڭ التىنشى كەزەڭى مەن 2027 جىلعى ازيا كۋبوگىنىڭ بىرلەسكەن ىرىكتەۋ كەزەڭىنىڭ ماتچتارى بولدى.

وسى ىرىكتەۋدە ۇزدىك ناتيجە كورسەتكەن وزبەكستان، اۋستراليا، ءباا، باحرەين، جاپونيا، يران، وڭتۇستىك كورەيا، كاتار، ساۋد ارابياسى، يراك، يوردانيا، ومان، قىتاي، پالەستينا، قىرعىزستان، كحدر، يندونەزيا مەن كۋۆەيت چەمپيوناتتىڭ ءۇشىنشى كەزەڭىنە شىقتى.

ەندى ولار 2026 جىلعى الەم چەمپيوناتىنىڭ ىرىكتەۋ ءتۋرنيرىنىڭ ءۇشىنشى كەزەڭىندە كۇش سىناسادى. دالىرەك ايتساق، 27 ماۋسىمدا جەرەبە تارتىلىپ، كوماندالار ءۇش توپقا بولىنەدى.

كوماندالار جەرەبە الدىنداعى مىنا سەبەتتەرگە ءبولىندى:

1-سەبەت: جاپونيا، يران، وڭتۇستىك كورەيا

2-سەبەت: اۋستراليا، قاتار، يراك

3-سەبەت: ساۋد ارابياسى، وزبەكستان، يوردانيا

4-سەبەت: ءباا، ومان، باحرەين

5-سەبەت: قىتاي، پالەستينا، قىرعىزستان

6-سەبەت: كحدر، يندونەزيا، كۋۆەيت

الەم چەمپيوناتىنىڭ ءۇشىنشى ىرىكتەۋ كەزەڭى 5 قىركۇيەكتە باستالادى. بۇل كەزەڭدە 18 كوماندا ارقايسىسى التى كوماندادان تۇراتىن ءۇش توپقا ءبولىنىپ، ءوز الاڭىندا جانە مسىرت الاڭدا وينايدى. ءار توپتىڭ ۇزدىك ەكى كومانداسى 2026 جىلعى الەم چەمپيوناتىنا تىكەلەي جولداما الادى.

XXIII الەم چەمپيوناتى 2026 جىلى اقش-تىڭ 11 قالاسىندا، مەكسيكانىڭ 3 جانە كانادانىڭ 2 قالاسىندا ماۋسىم مەن شىلدە ايلارىندا بولادى. فينال 19 شىلدەگە جوسپارلانىپ وتىر.