رىباكينا تاعى دا جىلدىڭ قورىتىندى تۋرنيرىندە جەڭىلدى

قازاقستاننىڭ ءبىرىنشى، الەمنىڭ بەسىنشى راكەتكاسى ەلەنا رىباكينا ار-ريادتا (ساۋد ارابياسى) ءوتىپ جاتقان WTA قورىتىندى تۋرنيرىندە ەكىنشى ماتچىن وتكىزدى، دەپ حابارلادى قتف.

رىباكينا دۇنيەجۇزىلىك رەيتينگىدە وزىنەن ەكى ساتى تومەن تۇرعان قىتايلىق چجەن تسينۆەنمەن وينادى.

وسىعان دەيىن قارسىلاستار ءبىر-بىرىمەن ەكى رەت ويناعاندا سونىڭ ەكەۋىندە دە  رىباكينا جەڭگەن بولاتىن. بۇل جولى ءبىرىنشى پارتيادا قىتايلىق تەننيسشى 4:1 ەسەبىمەن العا شىقتى. رىباكينا تارازى باسىن تەڭەستىرگەنىمەن، تاي-برەيك تسينۆەننىڭ ەنشىسىندە كەتتى. ەسەپ — 7:6 (7:4). ەكىنشىسىندە ەلەنا رىباكينا ەسە قايىردى. ەسەپ — 6:3. الايدا ءۇشىنشى، شەشۋشى سەتتە قىتايلىق تەننيسشى باسىمدىلىق تانىتتى. ول 6:1 ەسەبىمەن جەڭدى.

رىباكينا ءوز توبىنداعى سوڭعى كەزدەسۋىن الەمنىڭ 1-راكەتكاسى، بەلارۋس وكىلى ارينا سوبولەنكومەن وتكىزەدى.