تاتامي تورىندەگى تارتىس رەسپۋبليكا كۇنىنە ارنالدى

الماتى قالاسىندا قاراشانىڭ 10-11 كۇندەرى كيوكۋشينكايدان بالالار، جاسوسپىرىمدەر جانە قىزدار اراسىندا رەسپۋبليكا كۇنىنە ارنالعان اشىق تۋرنير بولدى. بۇل تۋرالى الماتى قالاسى بارلىق ستيلدىك كاراتە فەدەراتسياسى ءباسپاسوز قىزمەتىنىڭ دەرەگىنە سۇيەنگەن rast.kz حابارلادى.

قازاق سپورت جانە تۋريزم اكادەمياسىنىڭ سپورت زالىندا جالاۋ كوتەرگەن جارىستى الماتى قالاسى بارلىق ستيلدىك كاراتە فەدەراتسياسىنىڭ پرەزيدەنتى تالعار احماديەۆ ءسوز سويلەپ، اشىپ بەردى.

جارىستىڭ اشىلۋ سالتاناتى كەزىندە قازاقستاندىق ءبىر توپ كاراتەشىگە ءبىرىنشى جانە ەكىنشى دان دارەجەسىندەگى قارا بەلبەۋ تاپسىرىلدى. ونى جاپونيانىڭ حالىقارالىق ۇيىمى تاعايىندايدى. جاپون ەلى جاۋىنگەرلىك ونەرىنىڭ كوپشىلىگى سياقتى كاراتەنىڭ دە شاكىرتتىك (كيۋ) جانە شەبەرلىك (دان) دارەجەلەرى بولادى.

تۋرنيرگە 5-17 جاس ارالىعىنداعى 217 سپورتشى قاتىسىپ، ءوزارا باق سىناستى.

سايىس بارىسى باسەكەگە تۇسكەن جاس اتلەتتەردىڭ بارلىعى دا وزدەرىنىڭ تۋرنيرگە ۇلكەن دايىندىقپەن كەلگەندەرىن بايقاتتى. سوندىقتان تاتامي ۇستىندەگى كەز كەلگەن دەرلىك جەكپە-جەك ايتارلىقتاي تارتىس ۇستىندە ءوتتى. ولاردىڭ اراسىندا مەرۋەرت كاكىمقىزى مەن ايدانا رىسبەكوۆانىڭ شاكىرتتەرىن ءبولىپ ايتۋعا بولادى. اتاپ ايتقاندا، 12-13 جاس ارالىعىنداعىلار اراسىندا 50 كەلىگە دەيىنگى سالماقتاعى سىرىم اسقار كورەرمەننىڭ كوزايىمىنا اينالىپ، جەڭىسكە دەگەن جىگەرىمەن ەرەكشە كوزگە ءتۇستى. بۇدان باسقا، ەرنۇر جەمىسحان، ەركەجان ادىلقوجا، ايزەرە ەرىكقىزى، ەرسىن جاقسىباي، ارافات ۋسمانوۆ، سۇلتان تاسقىن، اسىلناز احمەت سىندى سەكىلدى بالعىن سپورتشىلار دا وزدەرىنىڭ شەبەرلىك دەڭگەيلەرىنىڭ جوعارىلىعىمەن ءتۋرنيردىڭ ءباسىن كوتەرىپ اكەتتى. سول سياقتى 5 جاستاعى قىزدار اراسىندا چەمپيون اتانعان زەينەپ شايزاندا ايرىقشا تالپىنىسىمەن ءوزىنىڭ بولاشاعى زور ەكەنىن تانىتتى.

جارىس جەڭىمپازدارىنا ارنايى كۋبوكتار مەن مەدالدار تاپسىرىلدى.

تۋرنيرگە «ەكرا قازاقستان» كومپانياسى (باسشىسى امىربەك ەلامانوۆ) دەمەۋشىلىك كورسەتتى.

سايىس سوڭىندا الماتى قالالىق فەدەراتسيا پرەزيدەنتى تالعار مۇحتار ۇلى بۇعان دەيىن دە ءوزى باسقاراتىن ۇيىمنىڭ جەتەكشىلىگىمەن وتكەن ءبىر تۋرنيرگە باس دەمەۋشىلىك جاساعان اتالمىش كومپانيا باسشىسى امىربەك نۇرتاس ۇلىنا العىس حات تابىس ەتتى.