Australian Open: رىباكينا مەن پۋتينتسەۆا ءۇشىنشى اينالىمعا شىقتى

تەننيسشىلەر ەلەنا رىباكينا مەن يۋليا پۋتينتسەۆا اۋستراليا اشىق چەمپيوناتىندا ءساتتى ويناپ جاتىر، دەپ حابارلادى قازاقستان تەننيس فەدەراتسياسى.

الەمنىڭ 7-راكەتكاسى ەلەنا رىباكينا چەمپيوناتتاعى ەكىنشى ويىنىن وينادى. ول دۇنيەجۇزىلىك رەيتينگىدە 191-ورىنداعى امەريكالىق، 17 جاستاعى يۆا يوۆيچكە قارسى كورتقا شىقتى.

رىباكينا ءبىرىنشى پارتيادا 6:0 ەسەبىمەن جەڭدى. ەكىنشى سەتتە يوۆيچ ۇزاققا سوزىلعان گەيمدە ەسەپتى تەڭەستىردى.  سودان كەيىن برەيك جاساپ، 2:1 ەسەبىمەن العا شىقتى. دەگەنمەن رىباكينا ونى الىسقا ۇزاتپادى. ول اۋەلى ەسەپتى تەڭەستىرىپ، سوسىن 6:3 ەسەبىمەن جەڭدى.

ماتچ 1 ساعات 20 مينۋتقا سوزىلدى. وسى ۋاقىتتا  رىباكينا 4 ەيسپەن بىرگە 11 برەيك-پوينتتىڭ بەسەۋىن پايدالاندى.

ەندى ەلەنا رىباكينا ءتورتىنشى اينالىمعا شىعۋ ءۇشىن الەمنىڭ 33-راكەتكاسى، 24 جاستاعى ۋكراينانىڭ تەننيسشىسى دايانا ياسترەمسكايامەن كەزدەسەدى. ول نەبارى 52-مينۋتتا چەرنوگوريالىق دانكا كوۆينيچتى 6:0، 6:1 ەسەبىمەن جەڭدى.

الەمنىڭ 23-راكەتكاسى يۋليا پۋتينتسەۆا ەكىنشى اينالىمدا دۇنيەجۇزىلىك رەيتينگىدە 204-ورىندا تۇرعان قىتايلىق چجان شۋايمەن كۇش سىناپ كوردى. پۋتينتسەۆا ءبىرىنشى پارتيانى 6:2 ەسەبىمەن اياقتادى. ەكىنشى سەتتە دە سول قارقىنىنان جاڭىلعان جوق. ەسەپ — 6:1.

ءبىر ساعاتتان ءسال استام ۋاقىتقا سوزىلعان ماتچتا يۋليا پۋتينتسەۆا 3 ەيسپەن بىرگە 6 برەيك-پوينتتىڭ بەسەۋىن پايدالاندى. ەندى ول ءتورتىنشى اينالىمعا شىعۋ ءۇشىن الەمنىڭ 10-راكەتكاسى، رەسەيلىك داريا كاساتكينامەن وينايدى.