قازاقستان قۇراماسىندا وزىنە سەنىمسىزدىك ءالى دە بار (ۆيدەو)

22 ناۋرىزدان 23 ناۋرىزعا قاراعان ءتۇنى ۋەلستىڭ استاناسى – كارديفف قالاسىندا فۋتبولدان قازاقستان قۇراماسى 2026 جىلعى الەم چەمپيوناتىنا ىرىكتەۋ ءتۋرنيرى اياسىندا العاشقى  كەزدەسۋىن وتكىزدى. ۇلتتىق قۇراما ۋەلس كومانداسىمەن ويناپ،  1:3 ەسەبىمەن جەڭىلدى.

وسى ماتچتان كەيىن ۇلتتىق قۇراما باس جاتتىقتىرۋشىسىنىڭ مىندەتىن اتقارۋشى ءالي اليەۆ كوماندانىڭ ويىنىنا باعا بەردى.

ونىڭ ايتۋىنشا، ءبىرىنشى تايمدا قۇراما جاقسى ويىن ورنەگىن كورسەتتى. ۇزىلىسكە 1:1 ەسەبىمەن شىقتى. الايدا، ەكىنشى تايمدا الاڭ يەلەرى ۇلتتىق قۇرامانىڭ ەكى قاتەلىگىن ءساتتى پايدالانىپ، ەكى رەت قاقپانى ءدال كوزدەدى. ويىن 3:1 ەسەبىمەن ۋەلس قۇراماسىنىڭ پايداسىنا شەشىلدى.

جالپى، فۋتبول جانكۇيەرى رەتىندە ايتاتىن بولساق، قازاقستان قۇراماسىنا ءوز ايىپ الاڭىندا الداسىپ، قىسقا پاس بەرىپ ويناۋعا بولمايدى ەكەن. بۇگىندە ەۋروپا كوماندالارىنىڭ وسالى جوق. ءبارى دە مىقتى قارسىلاس بولا الادى. بۇل ويىندا ۇلتتىق قۇراماعا قاقپاشى زارۋتسكي مەن قورعاۋشىلاردىڭ بولماشى قاتەلەگى بولماسا تەڭ ويناۋعا بولار ەدى. ەندى ايىپ الاڭىندا وسىنداي قاتەلىكتەر بولا بەرسە، ەرتەڭ ليحتەنشتەيننىڭ ءوزى ۇلتتىق قۇرامانى ءبىراز ابىگەرگە سالاۋى مۇمكىن. ولار سولتۇستىك ماكەدونيادان جەڭىلگەن سوڭ ءبىر ۇپاي الۋعا تىرىسادى.

بىراق قازاقستان ءۇش ۇپاي الۋ كەرەك. ۋەلسپەن ماتچتا 16 جاستاعى داستان ساتپاەۆتىڭ ويىنى ۇنادى. ول الاڭدى جاقسى كورەدى ەكەن.  قۇراماعا وسىنداي جالىنداپ تۇرعان جاستار كەرەك. تاعىبەرگەن، ماروچكين، ۆوروگوۆسكي، مۋجيكوۆ ءبىر تايم عانا ويناي الادى. زارۋتسكي پۋبليكاعا وينايتىن قاقپاشى ەكەنىن كورسەتىپ قالدى. جالپى، بۇگىنگى ماتچ جامان بولعان جوق. تاعى قايتالاپ ايتسام، ەگەر زارۋتسكي مەن قورعاۋشىلاردىڭ قاتەلىگى بولماسا ءبىر ۇپايدى الۋعا بولاتىن ەدى.

ءبىزدىڭ ويىنشىلاردىڭ بويىندا ماندراج ءالى دە بار. اليەۆتىڭ ويىندى اشىق ويناپ، شابۋىلعا ءجيى شىعۋدى ماقسات ەتكەنى ۇنادى.

وسىلايشا، قازاقستان  ىرىكتەۋ ءتۋرنيرىن جەڭىلىسپەن باستادى. وسى ماتچتان كەيىن ۇلتتىق قۇراما J كىشى توبىنداعى بەس كوماندانىڭ ىشىندە ءتورتىنشى ورىندا قالىپ وتىر. ۇزدىك ۇشتىككە سولتۇستىك ماكەدونيا، ۋەلس جانە بەلگيا قۇرامالارى جايعاستى. قازاقستان قۇراماسى ءبىر گولدىڭ ارقاسىندا عانا ليحتەنشتەيننىڭ الدىندا تۇر.

قازاقستان قۇراماسىنىڭ ىرىكتەۋ تۋرنيرىندەگى ەكىنشى ماتچى ليحتەنشتەينمەن 25 ناۋرىزدان 26 ناۋرىزعا قاراعان ءتۇنى بولادى.

داستان كەنجالين،

استانا