Qazaqstan quramasynda ózine senimsizdik áli de bar (VIDEO)

22 naýryzdan 23 naýryzǵa qaraǵan túni Ýelstiń astanasy – Kardıff qalasynda fýtboldan Qazaqstan quramasy 2026 jylǵy álem chempıonatyna irikteý týrnıri aıasynda alǵashqy  kezdesýin ótkizdi. Ulttyq qurama Ýels komandasymen oınap,  1:3 esebimen jeńildi.

Osy matchtan keıin ulttyq qurama bas jattyqtyrýshysynyń mindetin atqarýshy Álı Álıev komandanyń oıynyna baǵa berdi.

Onyń aıtýynsha, birinshi taımda qurama jaqsy oıyn órnegin kórsetti. Úziliske 1:1 esebimen shyqty. Alaıda, ekinshi taımda alań ıeleri ulttyq quramanyń eki qateligin sátti paıdalanyp, eki ret qaqpany dál kózdedi. Oıyn 3:1 esebimen Ýels quramasynyń paıdasyna sheshildi.

Jalpy, fýtbol jankúıeri retinde aıtatyn bolsaq, Qazaqstan quramasyna óz aıyp alańynda aldasyp, qysqa pas berip oınaýǵa bolmaıdy eken. Búginde Eýropa komandalarynyń osaly joq. Bári de myqty qarsylas bola alady. Bul oıynda ulttyq quramaǵa qaqpashy Zarýkıı men qorǵaýshylardyń bolmashy qatelegi bolmasa teń oınaýǵa bolar edi. Endi aıyp alańynda osyndaı qatelikter bola berse, erteń Lıhtenshteınniń ózi ulttyq quramany biraz ábigerge salaýy múmkin. Olar Soltústik Makedonııadan jeńilgen soń bir upaı alýǵa tyrysady.

Biraq Qazaqstan úsh upaı alý kerek. Ýelspen matchta 16 jastaǵy Dastan Sátpaevtyń oıyny unady. Ol alańdy jaqsy kóredi eken.  Quramaǵa osyndaı jalyndap turǵan jastar kerek. Taǵybergen, Marochkın, Vorogovskıı, Mýjıkov bir taım ǵana oınaı alady. Zarýkıı pýblıkaǵa oınaıtyn qaqpashy ekenin kórsetip qaldy. Jalpy, búgingi match jaman bolǵan joq. Taǵy qaıtalap aıtsam, eger Zarýkıı men qorǵaýshylardyń qateligi bolmasa bir upaıdy alýǵa bolatyn edi.

Bizdiń oıynshylardyń boıynda mandraj áli de bar. Álıevtiń oıyndy ashyq oınap, shabýylǵa jıi shyǵýdy maqsat etkeni unady.

Osylaısha, Qazaqstan  irikteý týrnırin jeńilispen bastady. Osy matchtan keıin ulttyq qurama J kishi tobyndaǵy bes komandanyń ishinde tórtinshi orynda qalyp otyr. Úzdik úshtikke Soltústik Makedonııa, Ýels jáne Belgııa quramalary jaıǵasty. Qazaqstan quramasy bir goldyń arqasynda ǵana Lıhtenshteınniń aldynda tur.

Qazaqstan quramasynyń irikteý týrnırindegi ekinshi matchy Lıhtenshteınmen 25 naýryzdan 26 naýryzǵa qaraǵan túni bolady.

Dastan KENJALIN,

ASTANA