SportPress.kz قازاقستان سپورت جاڭالىقتارى
جەڭىستىڭ 80 جىلدىعى قارساڭىندا قازاقستان رەسپۋبليكاسى پرەزيدەنتى ىستەرى باسقارماسى مەديتسينالىق ورتالىعىنىڭ «Almaty Resort» شيپاجايىنىڭ قىزمەتكەرلەرى سوعىس ارداگەرلەرىنە قۇرمەت كورسەتتى. سۇراپىل سوعىستى كورگەن ۆاسيلي زينچەنكو، نيكولاي تاراتۋنين مەن يۆان بەگۋنوۆ ەستەلىك ايتتى.
مەملەكەتتىك باعدارلاما بويىنشا ارداگەرلەر شيپاجايدا تەگىن ەمدەلۋگە مۇمكىندىگى بار. «Almaty Resort» مەديتسينالىق قىزمەتكەرلەرى ولارعا ۇنەمى كەلىپ جاعدايىن سۇراپ، دەنساۋلىعىن باقىلايدى، قولداۋ مەن قامقورلىق كورسەتەدى.
102 جاستاعى وتستاۆكاداعى پولكوۆنيك نيكولاي تاراتۋنين 18 جاسىندا مايدانعا اتتانادى. وزىنەن بۇرىن سوعىسقا كەتكەن بارلىق باۋىرى سوعىستا قازا تابادى. ءوزى دە اۋىر جاراقات الادى. بىراق سوعان قاراماستان امان قالدى. سوعىستان كەيىن نيكولاي الەكساندروۆيچ الماتى جاياۋ اسكەر ۋچيليششەسىن ءبىتىرىپ، شەكارا اسكەرىندە قىزمەت ەتەدى. بۇگىندە ول الماتىدا ۇلىمەن بىرگە تۇرادى. ءۇش نەمەرەسى مەن شوبەرەلەرى بار.
بيىل 101 جاسقا تولعان بارلاۋشى ۆاسيلي زينچەنكو — ستالينگراد شايقاسى مەن بەرلين شابۋىلى سياقتى شەشۋشى ۇرىستارعا قاتىسقان مايدانگەر. ول فەلدمارشال ءپاۋليۋستى تۇتقىنعا الىپ، ءوزى ىلەسىپ اپارعان. سوعىستان ورالعان سوڭ ۆاسيلي زينچەنكو الماتى ءسۇت كومبيناتىندا ەڭبەك ەتەدى. زايىبىمەن بىرگە ءۇش ۇل مەن ءبىر قىز تاربيەلەپ ءوسىردى. قازىر ولاردىڭ جەتى نەمەرەسى مەن ون ءتورت شوبەرەسى بار.
يۆان بەگۋنوۆ بيىل عاسىرلىق مەرەيتويىن اتاپ ءوتتى. ونىڭ تاعدىرى – جەتىمدىك، اشارشىلىق، مايدان دالاسى جانە سوعىستان كەيىنگى ءومىر جولىمەن ورىلگەن. ول 228-گۆارديالىق اتقىشتار پولكىنىڭ قۇرامىندا ۋكراين مايدانىندا سوعىسىپ، پۋلەمەتشى رەتىندە ەۋروپانى ازات ەتۋگە قاتىسقان. سوعىستان كەيىن الماتىدا قۇرىلىس سالاسىندا ەڭبەك ەتتى. قازىرگى ۋاقىتتا ارداگەر قىزى يرينامەن بىرگە تۇرادى. ونىڭ بەس نەمەرەسى، ون ءبىر شوبەرەسى جانە ءبىر شوپشەگى بار.
الماتىدا سوعىستىڭ ءتىرى كۋاگەرلەرى از قالدى. ولار ناعىز باتىرلار. ارداگەرلەردىڭ سوعىس جايلى ەستەلىكتەرى بۇگىندە ەرەكشە قۇندى، ۇرپاققا ۇلگى. ەرلىكتەرى ءۇشىن ولار ماقتاۋ سوزدەر كۇتپەيدى. مايدانگەرلەر ءۇشىن ەڭ باستىسى — قامقورلىق جانە شىنايى العىس.
نۇرلان قۇمار،
الماتى
