SportPress.kz قازاقستان سپورت جاڭالىقتارى
فۋتبولدان قازاقستان ۇلتتىق قۇراماسىنىڭ باس جاتتىقتىرۋشىسى ءالي اليەۆ 2026 جىلعى الەم چەمپيوناتىنا ىرىكتەۋ ءتۋرنيرى اياسىندا سولتۇستىك ماكەدونيا قۇراماسىمەن بولاتىن ويىن الدىندا باق وكىلدەرىنە ءباسپاسوز ءماسليحاتىن وتكىزىپ، ولاردىڭ سۇراقتارىنا جاۋاپ بەرىپ، ماتچ تۋرالى پىكىرىن ايتتى، دەپ حابارلادى قازاقستان فۋتبول فەدەراتسياسى.
– كوماندا دايىندىقتى ادەتتەگىدەي تارتىپپەن وتكىزىپ جاتىر. جوسپارلانعان دايىندىق كەزەڭىن اياقتادىق. بۇگىن سوڭعى جاتتىعۋىمىز بولادى. وندا كەيبىر ستاندارتتىق جاعدايلاردى پىسىقتايمىز. كوماندانىڭ فيزيكالىق، مورالدىق جاعدايى جاقسى، ويىنعا تولىق دايىنبىز دەپ ويلايمىن. گەورگي جۋكوۆتىڭ كىشىگىرىم جاراقاتى بار. سوڭعى مەديتسينالىق تەكسەرۋدىڭ قورىتىندىسى ونىڭ ەرتەڭگى ويىندا الاڭعا شىعۋ-شىقپاۋىن انىقتايدى. ال قالعان ويىنشىلار ساپتا، بارلىعى جەڭىس ءۇشىن بار كۇشىن سالۋعا دايىن.
– بەلارۋسپەن ماتچتا كوماندا تابيعي شوپتە وينادى، ال ەرتەڭگى ماتچ جاساندى الاڭدا بولادى. بۇل قيىندىق تۋدىرماي ما؟
– ارينە، الاڭ ساپاسى مەن جابىندىسىنىڭ اۋىسۋى اسەر ەتەدى. بەلارۋستە ماتچ الدىندا قاتتى جاۋعان جاۋىننىڭ كەسىرىنەن الاڭ اۋىر بولدى. ءتىپتى، ويىننىڭ باستالۋىن بەلگىسىز ۋاقىتقا كەيىنگە شەگەرۋگە تۋرا كەلدى. الاڭ وزگەرىسى قانشالىقتى اسەر ەتەتىنىن ەرتەڭگى ويىن كورسەتەدى. باستىسى – «استانا ارەنا» — ءوز الاڭىمىز. مۇندا ەكى جاتتىعۋ وتكىزدىك. ويىنشىلاردىڭ بۇل جابىندىعا بەيىمدەلىپ ۇلگەرگەنىنە سەنەمىن. بۇل فاكتور اسەر ەتپەيدى دەپ ۇمىتتەنەمىن.
– قۇراما ساپىندا بەلارۋسپەن جولداستىق ويىنمەن سالىستىرعاندا قانداي وزگەرىستەر بولادى؟
– جولداستىق كەزدەسۋلەردىڭ ماقساتى – ويىن تاجىريبەسى از فۋتبولشىلارعا مۇمكىندىك بەرۋ. بۇل – دايىندىق كەزەڭىنىڭ ءبىر بولىگى. بۇل پىكىرىمدى ماكسيم دە راستايدى: بەلارۋسپەن وتكەن ويىن الدىن الا جوسپارلانعان. كىمنىڭ قانشا مينۋت وينايتىنى بەلگىلى بولدى. ءبىز جاس ويىنشىلارىمىز – جاگوروۆ پەن جۇماحانوۆتى سىناپ كورۋىمىز كەرەك بولدى. جولداستىق كەزدەسۋلەر ارقىلى ويىنشىلار ۇلتتىق قۇرامانىڭ جۇيەسىنە بىرتىندەپ بەيىمدەلەدى. ەرتەڭگى ماتچتا الاڭعا شىعاتىن ويىنشىنىڭ بارلىعى بەلارۋسپەن وتكەن ويىندا تاجىريبە جيناپ ۇلگەردى. قازىر ولاردىڭ مورالدىق جانە فيزيكالىق جاي-كۇيىن باعالاپ، «استانا-ارەنادا» كىم نەگىزگى قۇرامدا وينايتىنىن شەشەمىز.
– سولتۇستىك ماكەدونيانىڭ بەلگيامەن ويىنىن كوردىڭىزدەر مە؟ قارسىلاس جايلى نە ايتاسىز؟
– ءيا، ارينە، كوردىك. ءبىز قارسىلاسىمىزدىڭ ىرىكتەۋ كەزەڭىندەگى بارلىق ويىنىن قاراپ شىقتىق، تالداۋ جاساپ، ويىنشىلارعا كورسەتتىك. سولتۇستىك ماكەدونيا – وتە مىقتى كوماندا. قۇرامىندا ەۋروپانىڭ ۇزدىك چەمپيوناتتارىندا وينايتىن فۋتبولشىلار بار. ۋەلس پەن بەلگياعا قارسى كەزدەسۋلەردە ولار ويىن سوڭىندا ەسەپتى تەڭەستىرىپ، مىنەز كورسەتتى. كوماندا قاراپايىم ەمەس، وزىنە ءتان ويىنى بار. بىراق مەن ءبىزدىڭ جىگىتتەرگە سەنەمىن.
– ستاس پوكاتيلوۆ قۇرامنان كەتتى دەگەن اقپاراتقا پىكىرىڭىز قانداي؟
– قاقپاشىلارعا قاتىستى جۇمىسقا ولەگ يگورەۆيچ ۆوسكوبوينيكوۆ جاۋاپ بەرەدى. ءبىز ۇنەمى بايلانىستامىز. ول قازاقستان چەمپيوناتىندا وينايتىن بارلىق قاقپاشىمەن سويلەسىپ وتىرادى. پوكاتيلوۆقا كەلسەك، ءبىز ءبارىن الدىن الا جوسپارلادىق. كىم بەلارۋسپەن، كىم سولتۇستىك ماكەدونيامەن وينايتىنى ناقتى بەلگىلى بولدى. بارلىق ويىنشى بۇل شەشىمنەن حاباردار. ستاس بۇل جاعدايدى تۇسىنىستىكپەن قابىلدادى. سوندىقتان ەشتەڭەدەن سەبەپ ىزدەۋدىڭ قاجەتى جوق. ءبىز ويىنشىلاردان ەشتەڭە جاسىرمايمىز، ولار دا بىزگە اشىق.
– ءسىز مارات بىستروۆتى شاقىردىڭىز، باقتيار زاينۋتدينوۆ كوماندامەن جاتتىعىپ ءجۇر. بىراق رامازان ورازوۆ شاقىرىلمادى. سەبەبى نەدە؟
– مەن قۇرامنىڭ سوڭعى ءتىزىمىن جاريالاماس بۇرىن رامازان ورازوۆپەن جەكە سويلەستىم. قازىرگى ۋاقىتتا ونىڭ كلۋبىندا ويىن تاجىريبەسى جوق ەكەنىن ايتىپ، جاعدايدى ءتۇسىندىردىم. بۇعان دەيىن ۋەلس جانە ليحتەنشتەينمەن بولعان ماتچتارعا تاجىريبەسى جەتىسپەسە دە شاقىردىق. ليحتەنشتەينگە قارسى ويىندا جاقسى ويناپ، ءوزىن كورسەتتى. ودان كەيىن دە حابارلاستىق. مەن وعان ونىڭ باستى قارۋى – پرەسسينگ، فيزيكالىق دايىندىعى مەن اگرەسسيا ەكەنىن ايتتىم. الايدا تۇراقتى ويىن تاجىريبەسى بولماسا، تولىققاندى باسەكەلەستىككە توتەپ بەرە المايدى. ءبىز ورازوۆقا ءبارىن اشىق جەتكىزدىك. ەگەر ول كلۋبىندا تۇراقتى ويناسا، قايتادان ۇلتتىق قۇراماعا كەلەدى. مارات بىستروۆ تا سول جاعدايمەن شاقىرىلعان. ۋەلسكە قارسى ويىندا وتە سەنىمدى وينادى، ليحتەنشتەينمەن ماتچتا سامورودوۆقا ناتيجەلى پاس بەردى. ول بابىنا تەز كەلىپ جاتىر، تەك قاجەتتى جاتتىعۋ رەجيمىن بەرۋ كەرەك. زاينۋتدينوۆكە كەلسەك – ءبىز «بەشىكتاشتىڭ» مەديتسينالىق شتابىمەن سويلەستىك.
ولار باقتيارعا جاتتىعۋعا جانە ويىندارعا قاتىسپاۋعا رەسمي ءوتىنىش جىبەردى. ودان كەيىن باقتياردىڭ ءوزى استاناعا كەلىپ، ۇلتتىق قۇرامانىڭ دارىگەرلەرىنە قارالۋعا نيەت ءبىلدىردى. ول مەديتسينالىق تەكسەرۋدەن ءوتتى. دەنە دايىندىعى باپكەرلەرىمەن بىرگە جۇمىس ىستەدى. ناتيجەسىندە وعان ءسپرينتسىز، جۇكتەمەسى جەڭىل جاتتىعۋلار جاساۋعا رۇقسات بەرىلدى. باقتيار قۇراممەن بىرگە، ول كوماندانى قولداۋ ءۇشىن وسىندا. ونىڭ وسىندا بولۋى كوماندالىق اتموسفەراعا وڭ اسەر ەتىپ جاتىر.
