قازاقستان ۇلتتار كۋبوگىندا جارتىلاي فينالعا شىقتى

ۆولەيبولدان قازاقستان ايەلدەر قۇراماسى ۆەتنامنىڭ استاناسى – حانوي قالاسىندا ءوتىپ جاتقان AVC ۇلتتار كۋبوگى توپتىق كەزەڭىنىڭ بەسىنشى ماتچىندا فيليپپين قۇراماسىمەن ويناپ، 0:3 (21:25، 15:25، 19:25) ەسەبىمەن ەسە جىبەردى.

فيليپپين ۆ توبىندا ءبىرىنشى ورىنعا شىقتى. وسىعان دەيىن قازاقستان 12، فيليپپين 10 ۇپاي جيناعان ەدى. سوندىقتان ۇلتتىق قۇراماعا ءوز توبىندا ءبىرىنشى ورىندا  قالۋى ءۇشىن 2:3 ەسەبىمەن جەڭىلسە دە، جەتكىلىكتى ەدى. الايدا وتانداستارىمىزدىڭ فيليپپين ۆولەيبولشىلارىمەن جولى بولماي، ەكىنشى ورىنىن ساقتاپ، 1/2 فينالعا شىقتى.

ەندى قازاقستان جارتىلاي فينالدا ۆەتنام كومانداسىمەن وينايدى. بۇل ەلدىڭ قۇراماسى ءتۋرنيردىڭ باستى ءفاۆوريتى. بىلتىر ۇلتتىق قۇراما فينالعا دەيىن جەتىپ، ۆەتنامنىڭ ءدال وسى كومانداسىنان جەڭىلگەن ەدى.

داستان كەنجالين،

استانا