كلۋبتار اراسىنداعى ءاچ: مەسسي «پاري سەن-جەرمەنگە» قارسى وينايدى

وسى كۇندەرى امەريكا قۇراما شتاتتارىندا فۋتبولدان كلۋبتار اراسىنداعى الەم چەمپيوناتى بولىپ جاتىر. بۇل باسەكە العاش رەت 2010 جىلى ۇيىمداستىرىلسا، سودان بەرى وعان بيىلعىداي 33 كلۋب قاتىسپاعان ەدى. بۇعان دەيىن دۇرمەكتى دوداعا ساۋساقپەن ساناۋعا بولاتىن كوماندالار عانا قاتىساتىن. ال بيىل وعان الەمنىڭ جەر-جەرىنەن ءوز قۇرلىقتارىنداعى تۋرنيرلەر مەن جارىستاردا اتى وزعان جاساقتار جينالىپ وتىر. ولار 8 توپقا بولىنگەن. ءوز گرۋپپالارىندا العاشقى ەكى ورىندى جەڭىپ العان كوماندا پلەي-وفف كەزەڭىنە جولداما الادى.

ازىرشە 1/8 فينالىنا شىققان التى كوماندا انىقتالدى. ا توبىندا برازيليانىڭ «پالمەيراس» كلۋبى ءبىرىنشى ورىنمەن، اقش-تىڭ «ينتەر مايامي» كومانداسى ەكىنشى ورىن الىپ، كەلەسى اينالىمعا شىقتى. «پورتۋ» (پورتۋگاليا) مەن «ءال-احلي» (ەگيپەت) ەكىنشى جانە ءۇشىنشى ورىندى قاناعات تۇتتى.

ەسكە سالا كەتسەك، امەريكالىق جاساقتىڭ قۇرامىندا الەمنىڭ 8 دۇركىن ۇزدىك ءفۋتبوليسى ارگەنتينالىق لەونەل مەسسي وينايدى. ال كلۋبتىڭ يەسى  — كەزىندە انگليا ۇلتتىق قۇراماسى مەن «مانچەستەر يۋنايتەد»، يسپانيانىڭ «رەال مادريد» كوماندالارىندا دوپ تەپكەن اتاقتى دەۆيد بەكحەم.

بۇگىن ەكى كوماندا توپتاعى سوڭعى ويىندارىن ويناپ، 2:2 ەسەبىمەن تەڭ تارقاستى. وسىلايشا، مەسسي ءوزىنىڭ بۇگىنگى تۋعان كۇنىنە سىيلىق جاساپ، كومانداسىمەن بىرگە كەلەسى اينالىمعا شىقتى.

بۇگىن ارگەنتينالىق تەڭبىل دوپ شەبەرى 38 جاسقا كەلىپ وتىر.

ەندى ول 1/8 فينالدا ۆ توبىندا ۇزدىك اتانعان ءوزىنىڭ بۇرىنعى كلۋبى فرانتسيانىڭ «پاري سەن جەرمەنگە» قارسى وينايدى.

بۇل گرۋپپادا ەكى تۋردان كەيىن برازيليانىڭ «بوتافوگو» جاساعى 6 ۇپايمەن كوش باسىندا تۇرعان ەدى. بۇگىن وڭتۇستىكامەريكالىقتار يسپانيانىڭ «اتلەتيكو» كلۋبىنان 0:1 ەسەبىمەن جەڭىلىپ، ەكىنشى ورىنعا سىرعىدى. ال ءمادريدتىڭ كومانداسى قارسىلاسىن جەڭىپ، قورجىنىنا 6 ۇپاي  جيناسا دا دوپ ايىرماشىلىعىنا بايلانىستى ءۇشىنشى ورىنمەن كەلەسى اينالىمعا شىعا المادى. بۇل توپتا سوڭعى ورىندا اقش-تىڭ «سيەتل سانۋدەرس» كومانداسى  قالىپ قويدى. ولار سوڭعى ويىنىن «پاري سەن-جەرمەنمەن» ويناپ، 0:2 ەسەبىمەن جەڭىلدى.

G توبىندا يتاليانىڭ «يۋۆەنتۋس» كلۋبى مەن انگليانىڭ «مانچەستەر سيتي» كومانداسى كۇنى بۇرىن كەلەسى اينالىمعا جولداما الىپ قويعان. بۇل توپتا ماروككونىڭ «ۆيداد» پەن ءباا-ءنىڭ «ءال-اين» جاساعى كوڭىل كونشىتەرلىك ناتيجە كورسەتپەدى.

باسقا توپتاردا العاشقى ءۇش ورىندا كەلە جاتقان كوماندالاردىڭ ءبارىنىڭ 1/8 فينالعا شىعۋعا شانسى بولىپ تۇر. ولار ازىرگە مىناداي ناتيجە كورسەتىپ وتىر.

س توبى

«باۆاريا» (گەرمانيا) – 6

«بەنفيكا» (پورتۋگاليا) – 4

«بوكا حۋنيورس» (ارگەنتينا) – 1

«وكلەند سيتي» (جاڭا زەلانديا) – 0

 

D توبى

«فلامەنگو» (برازيليا) – 6

«چەلسي» (انگليا) – 3

«ەسپەرانس» (تۋنيس) – 3

«لەنو» (مەكسيكا) – 0

«لوس اندجەلەس» (اقش) – 0

 

ە توبى

«ريۆەر پلەيت» (ارگەنتينا) – 4

«ينتەر» (يتاليا) – 4

«مونتەررەي» (مەكسيكا) – 2

«ۋراۆا رەد دايموندس» (جاپونيا) – 0

 

F توبى

«فلۋمينەنسە» (برازيليا) – 4

«بورۋسسيا» د (گەرمانيا) – 4

«مامەلودي سانداۋنز» (وڭتۇستىك افريكا رەسپۋبليكاسى) – 3

«ۋلسان حەندە» (وڭتۇستىك كورەيا) – 0

 

ن توبى

«رەال مادريد» (يسپانيا) – 4

«رەد بۋل زالتسبۋرگ» (اۆستريا) – 4

«ءال-ءحيلال» (ساۋد ارابياسى) – 2

«پاچۋكا» (مەكسيكا) – 0

الەم چەمپيوناتىنىڭ جۇلدە قورى — 1 ميلليارد اقش دوللار. چەمپيون كوماندا 125 ميلليون دوللاردى يەلەنەدى. قالعان قاراجاتتى 31 كلۋب جارىستاعى ناتيجەسىنە بايلانىستى بولىسەدى.

 

داستان كەنجالين،

استانا