World Boxing: قازاق بوكسشىلارى كەلەسى اينالىمعا شىقتى

بوكستان جاقسىلىق ۇشكەمپىروۆ اتىنداعى جەكپە-جەك سارايىندا وتانداستارىمىز ءۇشىن الەم كۋبوگىنىڭ ءبىرىنشى جارىس كۇنى مارەسىنە جەتتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

كۇندىزگى سەسسيادا ءۇش دۇركىن الەم چەمپيونى نازىم قىزايباي (48 كگ) مەن انەل ساقىش (54 كگ) ءساتتى دەبيۋت جاساسا، وكىنىشكە قاراي، 70 كەلىدەگى ابىلايحان ءجۇسىپوۆ قاباعىنىڭ جارىلۋىنا بايلانىستى ءتۋرنيردى اياقتاۋعا ءماجبۇر بولدى.

كەشكى سەسسيادا الەم چەمپيوناتىنىڭ كۇمىس جۇلدەگەرى ۆيكتوريا گرافەەۆا (60 كگ) مەن ناتاليا بوگدانوۆا (70 كگ) دا قارسىلاستارىنان باسىم ءتۇستى، — دەلىنگەن حابارلامادا.

استانا تورىندە رەكوردتىق 29 ەلدەن 300-گە جۋىق بوكسشى باس قوستى. ءبىرىنشى كەزەڭدە (برازيليا) 19 ەل قاتىسسا، ەكىنشى كەزەڭدە (پولشا) 24 مەملەكەت جۇلدەگە تالاسقان.

سپورتتى دامىتۋ ديرەكتسياسىنىڭ حابارلاۋىنشا، بىر اپتاعا سوزىلاتىن دودادا قازاقستان قۇراماسى بارلىق 20 سالماقتا (ەر جانە ايەل) ەڭ ۇزدىك بوكسشىلارىن قاتىستىرادى. ولاردىڭ اراسىندا جەتى الەم چەمپيونى (نازىم قىزايباي، الۋا بالقىبەكوۆا، ايدا ابىكەەۆا، سانجار تاشكەنباي، ماحمۇد سابىرحان، نۇربەك ورالباي، بەكزاد نۇرداۋلەتوۆ) جانە ەكى پاريج وليمپياداسىنىڭ جۇلدەگەرى (نازىم قىزايباي مەن نۇربەك ورالباي) بار.

ايتا كەتەتىنى، 30 ناۋرىز — 6 ءساۋىر ارالىعىندا فوس-دۋ-يگۋاسۋ (برازيليا) قالاسىنداعى العاشقى كەزەڭدە جەرلەستەرىمىز 3 التىن، 3 قولا جۇلدە جەڭىپ العان بولاتىن. سالىستىرمالى تۇردە سول كەزدە قۇرام 100 پايىزعا تولىقتاي جاڭاردى.

بۇعان دەيىن استانا قالاسى الەم كۋبوگىنىڭ كوماندالىق باسەكەسىن سوناۋ 2002 جىلى قابىلداپ، گەننادي گولوۆكين، مۇحتارحان دىلدابەكوۆ، گاليب جافاروۆ سىندى جەرلەستەرىمىز كۇمىس مەدالدى جەڭىپ العان بولاتىن.

استانا قالاسىنىڭ تۇرعىندارى جەكپە-جەكتەردى كۇندىز 14:00 جانە كەشكە 19:00-دە ەكى سەسسيا بويىنشا تاماشالاي الادى.