Bıylǵy jyldyń úılený toıynyń trendteri: shaǵyn orta, ashyq aspan astyndaǵy saltanat jáne dástúrge qurmet

Qazirgi jas jubaılar sán-saltanaty asyp-tasqan úlken toılardan góri, janǵa jaıly, shynaıy sezimge toly, ár sáti muqııat oılastyrylǵan shaǵyn toılardy jıi tańdaıdy.

Bıylǵy jyly úılený toılaryn tabıǵat aıasynda ótkizý, jasyl jelektiń ortasynda  merekelik dastarhan jaıý sánge aınalýda. Ári, otbasyn qurýǵa sanaly ári jaýapty kózqaras ta baıqalady.

Ǵashyqtar «Almaty Resort» shıpajaıyn tek demalys orny retinde emes, erekshe kúnge arnalǵan ǵajaıyp alań retinde de jıi tańdaıdy. Shıpajaı aýmaǵynda 21 gektarlyq saıabaq ornalasqan: bıik aǵashtar, kógaldy alańdar men taýdyń saf aýasy tabıǵı úndestik pen ońashalyq sezimin syılaıdy.

Eń tanymal saltanattar bizde dál osy saıabaqta — gúlmen bezendirilgen arka astynda, aǵashtardyń arasynda ótedi. Meıramhana qabyrǵasynyń ornyna tabıǵat pen qustardyń saıraǵany — múlde basqa sezim syılaıdy. Keshki as ta osynda, ashyq aspan astynda uıymdastyrylady. Bul óte sándi ári shynaıy kórinedi. О́zińdi naǵyz kıno keıipkerindeı sezinesiń, — deıdi «Almaty Resort» shıpajaıynyń marketology Valerııa Dıgaı.

Onyń aıtýynsha, jas jubaılar toıǵa eń jaqyn jandaryn ǵana shaqyryp, qalǵan týystary men dostary úshin rásimdi onlaın tikeleı efırde tamashalaý múmkindigin usynady.

Bizde bul úshin barlyq jaǵdaı jasalǵan: sapaly dybys, turaqty ınternet qoljetimdi. Qonaqtar alysta bolsa da, mańyzdy sátke kýá bola alady, — dep tolyqtyrdy ol.

Mundaı format sán-saltanatty, shynaıylyqty jáne qalyptasqan qaǵıdalardan tys erkindikti baǵalaıtyn juptarǵa erekshe unaıdy. Qonaqtardyń sany ádette 20-dan 80 adamǵa deıin bolady — bul árbir qonaqqa jeke kóńil bólýge ári keshti jyly, otbasylyq atmosferada ótkizýge múmkindik beredi.

Betashar, shashý syndy qazaqtyń dástúrleri jandy mýzyka, tabıǵat aıasyndaǵy neke qııý rásimi, qonaqtardyń júrekjardy tilekteri sııaqty eýropalyq elementtermen úılesimdi ushtasady. Mázirde de talǵam úılesimi saqtalǵan: baýyrsaqtan bastap avtorlyq tiskebasarlarǵa deıin ártúrli taǵam usynylady.

Biz as mázirin keshtiń formatyna qaraı úılestirip beremiz. Bireýler dástúrli ystyq taǵamdy qalasa, endi biri — jeńil kanape men trıýfel maıymen daıyndalǵan pastany tańdaıdy. Al kesilgen et, qazy-qartasyz birde-bir toı ótpeıtin shyǵar – bul bizdiń ulttyq kodymyz. Biz úshin as máziri de toıdyń jalǵasy ispettes: jeńil, merekelik ári estetıkalyq bolýy tıis, – deıdi tamaqtandyrý bóliminiń jetekshisi Oljas Bekenov.

Sońǵy ýaqytta adam ómirindegi mańyzdy kezeńge sanaly túrde qadam basý baıqalady. Statıstıka boıynsha, 2025 jyldyń alǵashqy úsh aıynda Qazaqstanda shamamen 22,5 myń neke tirkelgen — bul ótken jyldyń osy kezeńimen salystyrǵanda 16%-ǵa az. Búginde kóptegen juptar otbasyn qurýdy kezdeısoq emes, sanaly túrde, shynymen daıyn bolǵan kezde ǵana josparlaıdy.

Úılený toıy — aýqym úshin jarys emes, mán-maǵyna úshin jasalatyn erekshe sát. Bıylǵy toılardyń kelbeti osyndaı. Bul kúni bári mańyzdy: ótetin oryn, atmosfera, janyńdaǵy eń jaqyn adamdar jáne eń bastysy — jańa otbasynyń qurylý sátindegi júrekti terbeıtin sát.

Nurlan QUMAR,

ALMATY