SportPress.kz قازاقستان سپورت جاڭالىقتارى
«قايرات» كلۋبى UEFA چەمپيوندار ليگاسى ەكىنشى ىرىكتەۋ كەزەڭىندە كامبەك جاسادى.
الماتىنىڭ فۋتبول كومانداسى فينليانديانىڭ كۋپس جاساعىنان سىرت الاڭدا 2:0 ەسەبىمەن جەڭىلگەنىنە قاراماستان، ورتالىق ستاديوندا مىڭداعان جانكۇيەردىڭ الدىندا 3:0 ەسەبىمەن جەڭىپ، جارىستىڭ ءۇشىنشى كەزەڭىنە شىقتى.
ماچتا «قايرات» قارسىلاستارىنان الاڭنىڭ بارلىق جەرىندە ۇستەمدىك تانىتتى. ولار ويىن باستالىسىمەن قوناقتاردىڭ قاقپاسىنا ءجيى-ءجيى شابۋىل جاساپ، سىرت الاڭدا كەتكەن ەسەنى قايتارۋعا تىرىستى.
9-مينۋتتا داستان ساتپاەۆ العاشقى گولدىڭ اۆتورى اتاندى. ونىڭ الىستان شىرەنە تەپكەن دوبى «كۋپس-تىڭ» قاقپاسىنان ءبىر-اق شىقتى. سودان كەيىن جورجينو 29-مينۋتتا، ۆالەري گرومىكو 44-مينۋتتا نىسانانى ءدال كوزدەدى. اسىرەسە، گرومىكونىڭ سول قاپتالدان اتىپ شىعىپ، «توعىزدىققا» تيگەن دوبىنا تالاي جانكۇيەر تاڭداي قاقتى.
ەكىنشى تايمدا سۋومي ەلىنىڭ كومانداسى تارازى باسىن تەڭەستىرۋگە تىرىسقانىمەن، ولارىنان ەشتەڭە شىقپادى.وسىلايشا «قايرات» اسا ماڭىزدى ويىندا 3:0 ەسەبىمەن جەڭىپ، ءتۋرنيردىڭ ءۇشىنشى ىرىكتەۋ كەزەڭىنە شىقتى.
ەندى «قايرات» «سلوۆان» (سلوۆاكيا) مەن «زرينسكي» (بوسنيا جانە گەرتسوگوۆينا) كوماندالارىنىڭ ماتچىندا جەڭگەن كلۋبپەن وينايدى.
ءبىرىنشى ىرىكتەۋ كەزەڭىندە الماتىنىڭ كلۋبى ەكى ويىننىڭ ناتيجەسىمەن سلوۆەنيانىڭ «وليمپياسىن» (1:1، 2:0) ەسەبىمەن جەڭدى.
داستان كەنجالين،
استانا
